Таван жил тутам явагддаг “Нийгмийн үзүүлэлтийн түүвэр судалгаа” энэ сарын 21-нд эхлэх гэж байна.
Бэлтгэл ажлын нэг хэсэг нь мэдээлэл цуглуулалтын ажилтнуудыг сургаж бэлтгэх юм. Сургалтыг амжилттай зохион байгуулснаар чанартай мэдээлэл цуглуулах, улмаар гарсан үр дүнг бодлого, хөтөлбөрт ашиглахад чухал ач холбогдолтой юм.Үүнтэй холбоотойгоор 120 хүнийг хамруулсан сургалтыг сарын хугацаанд зохион байгуулжээ.
Нийгмийн үзүүлэлтийн түүвэр судалгаанд хүүхдийн өндөр, жинг хэмжих, давсны иодын агууламж шалгах, өрхийн ундны усны чанар шалгах (е коли) шинжилгээг хийдэг. Уг судалгаа нь хүүхэд, эмэгтэйчүүдийн эрүүл мэнд, боловсрол, өсөлт, хөгжил, хамгаалал, өрхүүдийн нөхцөл байдал, тэдний эрхийн хэрэгжилт болон эмэгтэйчүүд, эрэгтэйчүүдийн ХДХВ, ДОХ-ын талаарх мэдлэг, бэлгийн зан үйл зэрэг олон талт нийгмийн үзүүлэлтүүдийг уялдуулан судалж, улмаар бодлого хөтөлбөр боловсруулагч, шийдвэр гаргагч нарт төдийгүй судлаач, эрдэмтэд болон сонирхсон хүн бүхэнд шаардлагатай статистикийн үнэн бодит мэдээллийг бий болгох юм.
Энэхүү судалгаагаар Тогтвортой хөгжлийн зорилт болон хүн амын эрүүл мэнд, нөхөн үржихүй, эх, нялхсын талаар төр, засгаас дэвшүүлсэн бодлого, хөтөлбөрийн хэрэгжилтийг дүгнэхэд шаардлагатай мэдээллийг гаргана