Улаанбаатар хотод тарваган тахал болон мал, амьтны гоц халдварт шүлхий, хонины цэцэг өвчин дамжин орж ирэхээс урьдчилан сэргийлэх зорилгоор наймдугаар сарын 1-ний өдрөөс аравдугаар сарын 15-ны өдөр хүртэлх хугацаанд шалган нэвтрүүлэх товчоодод 24 цагаар шалгалтыг зохион байгуулахаар болжээ.
Үүнд, Сонгинохайрхан дүүргийн Эмээлт, түүхий эдийн зах, Баруун туруун, Хан-Уул дүүргийн Яармаг, Нисэх-биокомбинат, Баянзүрх дүүргийн Баянзүрхийн товчоо, Налайх дүүргийн тавдугаар хороо Тэрэлж, зүүн аймаг явах чиглэл, дөрөвдүгээр зөрлөгийн пост, Багануур дүүргийн Хэрлэнгийн гүүрний авто техникийн шалган бүртгэх товчоо зэрэг газруудад ариутгал халдваргүйжүүлэлт, хяналт шалгалт явуулах ажлын хэсэг ажиллах юм байна.
Мөн Хяналтын хөдөлгөөнт эргүүлийг “Чингис хаан” нисэх онгоцны төв буудал, Иргэний нисэхийн ерөнхий газрын Хилийн эрүүл ахуй халдвар судлалын алба, Төмөр замын төв буудалд, Төмөр замын Мэргэжлийн хяналтын алба, Баянгол дүүрэг “ТОСО” худалдааны төв, Сүхбаатар /7 буудал/, Баянзүрх /Гачуурт/, Чингэлтэй /Гүнт/ дүүргийн нутаг дэвсгэр дэх цагдаагийн суурин пост, бусад дүүрэгт цагдаагийн хөдөлгөөнт эргүүлийг хот, дүүрэг рүү ордог баталгаат бус замуудад тус тусын цагдаа, хэв журам сахиулах албадтай хамтран зохион байгуулах болжээ.