Нүүрсний гэх хэрэгт холбогдуулан АТГ-аас өнгөрсөн сард нэр бүхий 17 улстөрчийг олон нийтэд зарласан. Үүнд УИХ-ын гишүүн Б.Баттөмөр, Ц.Анандбазар, Н.Наранбаатар, Ц.Сэргэлэн, Ш.Раднаасэд, Д.Бат-Эрдэнэ нарын нэр эхэлж гарч ирсэн. Дараа нь УИХ-ын гишүүн Ж.Мөнхбат, ХНХ-ийн сайд Т.Аюурсайхан нар нэмэгдсэн. Харин явцын дунд Б.Баттөмөр, Ц.Анандбазар, Ц.Сэргэлэн нарын гишүүдийг тухайн хэрэгт холбогдолгүй гэж зарласан. Юутай ч одоогийн байдлаар прокуророос Н.Наранбаатар, Ш.Раднаасэд, Ж.Мөнхбат, Т.Аюурсайхан, Б.Энх-Амгалан нарын гишүүдийг бүрэн эрхээс нь түдгэлзүүлэн шалгах хүсэлтээ УИХ-д хүргүүлсэн гэх. Энэ долоо хоногоос эхлээд зарим нэр бүхий гишүүдийн асуудлыг холбогдох Байнгын хороод хэлэлцэж эхлээд байна. Өчигдрийн Төрийн байгуулалтын байнгын хороогоор УИХ-ын гишүүн Ж.Мөнхбатын асуудлыг хэлэлцэж, ямартай ч эхний удаа түүний хүсэлтийг хүлээн авахыг дэмжжээ. Түүний хувьд энэхүү хуралд оролцох боломжгүй гэдгээ хэлсэн. Одоо УИХ-ын чуулганаар асуудлыг эцэслэж шийднэ.
Харин УИХ нүүрсний хэрэгт холбогдсон дээрх гишүүдийгээ эгнээндээ авч үлдэхээр хөөцөлдөж эхэлжээ. Хөрөнгө мөнгө гаргаж, тэднийгээ өмгөөлж хамгаалах ажлыг хийхээр бужигнаж байгаа бололтой. Иргэдийн хувьд нүүрсний гэх хэрэгт нэр холбогдсон гишүүдийг УИХ бүгдийг нь чөлөөлж, хуулийн дагуу шалгуулчих байх гэсэн хүлээлттэй байсан. Харамсалтай нь эрх баригчид гишүүддээ авч үлдэхийн тулд зохион байгуулалтад орсон гэдгийг улс төрийн хүрээнийхэн ярьж байна. Угтаа олон нийтийн зүгээс энэхүү хэрэгт холбогдсон улстөрчдийг АТГ-аас ил тод болгосныг зөв жишиг, зөв хандлага тогтож байна гэж ойлгосон. Гэвч УИХ иргэдийг бус гэмт хэрэгт холбогдсон гишүүдийг хамгаалсан шийдвэр гаргахаар ажиллаж эхэлсэн нь тоогүй. Нөгөөтэйгүүр эрх баригчид үнэмлэхүй олонхоосоо нэг ч суудлыг эзэнгүй болгохгүйгээр ирэх жилийн УИХ-ын ээлжит сонгуультай золгохоор шийдсэн гэлээ. Хэрэв энэ үнэн бол хаврын улс төр мөн ч айхавтар болно гэдгийг судлаачид хэлж байна. Учир нь авлигал, хээл хахууль, хулгайн хэрэгт холбогдсон улстөрчдийнхөө хэргийг шийдэж, шударга ёс тогтох эхлэл тавигдлаа гэсэн хүлээлт, итгэл ард түмэнд төрж эхэлж байсан юм. Иргэдийн энэхүү хүлээлтийн хариуд УИХ хэрэгт холбогдсон гишүүдийг хамгаалан авч үлдэх гэж байна. Хэрэв нэр холбогдсон дээрх гишүүдийг УИХ аваад үлдвэл хаврын улс төр гэж айхавтар үйл явдал болох нь гарцаагүй. Ард түмэн хүссэн хүсээгүй төв талбай дээр жагсаж, эсэргүүцлээ илэрхийлнэ. Ингэж гарч ирсэн ард түмний хөлд Монгол Улс тэсэж үлдэх үү, эрх баригчид аа. Хаврын улс төрийн халалтыг яаж давах, ямар үр дүн гарахыг тооцож үзсэн үү, гишүүд ээ.