Зуны дэлгэр цагаар ноосоо хаачлуулсан хонин сүрэг шимт хөрснөө идээшин тарга тэвээрэг хэдийн авчээ. Монголчуудын эрийн гурван наадам удахгүй тохиох гэж буй энэ үед бид наадмын шөлний хонины үнэ ханш ямар байгааг тодрууллаа. Тухайлбал бидний сайн мэдэх “Эмээлт” зах дээр нуруундаа хуруу зузаан өөхтэй төлөг 80-95 мянган төгрөгийн ханштай байна. Харин нас бие гүйцсэн эр хонь 110-150 мянган төгрөгийн үнэтэй байв. Наадам дөхөөд ирэхээр хүмүүс найз нөхөд, хамт олон, гэр бүлтэйгээ ойр зуурхан салхинд гарч, халуун чулуу барьж, хорхогны шөл уух нь их. Хонь ч гэлтгүй өдий цагийн ямааны мах амт шимтэй. Эмээлт зах дээр бага ямаа 60-80 мянга, эр ямаа 90-120 мянган төгрөгөөр борлуулагдаж байна.
Э.МӨНХ