Маргааш Олон улсын хүүхдийн эрхийг хамгаалах өдөр бөгөөд энэ баярыг жил бүр орон даяар тэмдэглэн өнгөрүүлдэг билээ. Соёл урлагийн байгууллагууд, тэр дундаа Улаанбаатар хотын музейнүүд энэ баярыг тэмдэглэхэд идэвхтэй оролцдог. Өчигдөр хэдэн музейгээр орж Олон улсын хүүхдийн эрхийг хамгаалах өдрөөр залуу үзэгчдэдээ зориулан юу хийхээр төлөвлөж байгаа талаар сонирхсон юм. Орсон музейнүүд нэлээд ачаалалтай, хөл хөдөлгөөн ихтэй байлаа.
Г.Занабазарын нэрэмжит Дүрслэх урлагийн музей энэ өдөр “Урлаг ба хүүхэд нас -2016” өдөрлөгийг зохион байгуулахаар бэлтгэж байгаа тухай захирал У.Сарантуяа ярилаа. Зургадугаар сарын 1-ний өдөр хамгийн түрүүн өглөө эрт музейн өмнөх талбайгаа угааж цэвэр цэмцгэр орчноороо залуу үзэгчдээ угтах гэнэ. Энэ жил тус музей нь анх удаагаа нээлттэй микрофоноо ажиллуулахаар болжээ. Бяцхан тайзан дээр хүссэн хүүхэд нь гарч дуртай дуугаа дуулж, шүлэг унших юм байна. Баярын өдөр тус музейг үзсэн хүүхэд бүрийг хонжвортой сугалаанд оролцуулах аж. Нийтдээ 200 орчим сугалаа бэлтгэсэн бөгөөд бүгд хонжвортой. Харин хонжворт нь зүгээр нэг тоглоом, амттан бус соёлын утга агуулгаар баяжигдсан урлагийн бүтээлүүд өгөх гэнэ. Жишээлбэл, зураач Б.Шаравын “Монголын нэг өдөр” бүтээлээс загварлан хийсэн зурагт эвлүүлдэг “Puzzle” тоглоом гэх мэт. Дүрслэх урлагийн музей нь хүй нэгдлийн үеэс XX зууны эхэн үеийг хүртэлх Монголын урлагийн дурсгалыг хадгалж хамгаалж байдаг. Тиймээс урлагийн янз бүрийн төрлийн арга технологийг танилцуулах үүднээс VII-XVII зууныг хүртэлх долоон төрлийн үзмэрийг хүүхэд багачуудад гараараа барьж үзэх боломж олгох юм байна. Эдгээр үзмэрүүдээ зориулалтын материалаар жинхэнээс нь ялгарах зүйлгүйгээр тусгайлан хийлгүүлжээ. Хүүхдүүддээ зориулан бас нэгэн бэлэг бэлтгэснийг сонирхуулъя. Үзэгч хүүхдүүд маань ханан дээр өөрийнхөө дуртай зургийг зурж болох юм. Тус музейн боловсролын өрөөний нэг ханыг үүнд зориулан бэлдсэнээр бяцхан үзэгчдэд өөрсдийнхөө авьяасыг харуулах боломж олгож байгаа юм.
Үндэсний түүхийн музей нь өнөөдөр буюу тавдугаар сарын 31, зургадугаар сарын 1-ний өдрүүдэд хүүхдүүдэд мөн үнэгүй үйлчилнэ. Жил бүр энэ өдрийг угтан олон арга хэмжээ зохион байгуулдаг уламжлал олон жилийн өмнөөс тогтжээ. Энэ жил “Үлгэрийн баатрын ертөнцөөр аялсан нь” хэмээх сонирхолтой арга хэмжээ болно. Үндэсний түүхийн музейн өмнөх талбайд хүүхдүүдийг үлгэрийн баатрууд угтах бөгөөд хүсвэл тэдэнтэй цуг зургаа авахуулж болох юм байна. Улс орны түүхийг өгүүлсэн уг музейд XIII-XIV зууны үеийн Монголын хаад, хатад, баатруудын хувцас хадгалагдаж байдаг. Түүнийг самбар дээр зурсан бөгөөд толгойгоо хийж зургаа авахуулахад өмссөн мэт харагдах. Монголын үндэсний хорол, үйчүүр, алаг мэлхий зэрэг оюун ухаан хөгжүүлдэг үндэсний уламжлалт тоглоомууд байдаг. Өнөө үед эдгээр нь бараг мартагдсан гэж болно. Тиймээс Үндэсний түүхийн музейн хамт олон тэдгээрийг залуу үедээ эргэн сануулах зорилгоор тэдгээр тоглоомуудыг хэрхэн тоглохыг хүүхдүүддээ зааж өгөх юм байна. Тус музейн боловсролын өрөөнд Монголын уламжлалт ахуй амьдралыг харуулсан бяцхан гэр байдаг. Үүнийг ч үзэх боломж олгож байгаа юм. Боловсрол, соёл шинжлэх ухааны яамнаас залуу үеийг хүмүүжүүлэхэд музейн оролцоо чухал үүрэгтэй хэмээн үздэг аж. Тиймээс тус музейн захиргаа 10 дугаар ангийн хүүхдүүдийг үнэгүй үзүүлдэг болсон байна. Зургадугаар ангиасаа хойш дөрвөн жил түүхийн хичээлийг заалгуулсан хүүхдүүд улс орныхоо өнгөрсөн үеийн тухай тодорхой мэдлэг, мэдээлэлтэй болсон тул тус музейг үзэхэд яг тохиромжтой хэмээн үзжээ.
Чойжин ламын сүм музей “Бүтээлч хүүхдүүд-2016” өдөрлөг зохион байгуулахаар бэлтгэсэн байна. Энэ жилийн арга хэмжээнүүдээ “Хүүхэд бүхэн хөөрхөн” уриан дор явуулахаар болжээ. Өмнөх жилүүдэд болсон өдөрлөгүүдэд үзэгч хүүхдүүд маш идэвхтэй оролцсоор ирсэн нь Чойжин ламын сүм музейн хамт олонд урам зориг хайрласан байна. Тиймээс энэ жил гар зураг, зохион бичлэг, уран бичлэгийн уралдаан болох бөгөөд бас нэгэн онцлог нь гэвэл зорилтот бүлгийн 1000 гаруй хүүхдийг тусгайлан зохион байгуулж буй арга хэмжээнүүддээ хамруулахаар болжээ. Нийслэлийн V сургуулийн дэргэдэх ардын урлагийн “Эгшиглэн-3” хамтлаг, залуу уран бүтээлч Ата Боргужин, “Хурган крью” хамтлаг энэ үеэр үзэгч хүүхдүүдэд уран бүтээлээ толилуулах юм байна. Ийнхүү Чойжин ламын сүм музейд очсон хүүхдүүд маань түүхийн дурсгалт үзмэрүүдтэй танилцаад зогсохгүй урлагийн тоглолтыг үзэж сонирхох боломжтой.