Монголоос ОХУ-д төлөх 174 сая ам.долларын өрийг тэглэсэн бичигт ОХУ-ын Ерөнхийлөгч В.Путин гарын үсэг зурсан тухай “www.sputniknews.com” мэдээлжээ.
ОХУ-ын Холбооны зөвлөлөөс баталсан баримт бичигт “Монгол Улсаас ОХУ-ын өмнө хүлээсэн өрийг тэглэх тухай хуулийн тайлбарт 2010 оны арванхоёрдугаар сарын байдлаар Монгол Улсын нийт өрийн үлдэгдэл 174.2 сая ам.долларт хүрсэн. Өрийг төлөх хугацаа хэтэрсэн тул тэглэж байна” гэж бичжээ. Өрийг тэглэх талаар 2010 оны 12 дугаар сард хоёр тал Москва хотод гарын үсэг зурсан ч хууль, эрх зүйн хяналтын шатуудыг дамжсаар өнөөдөртэй золгосон тухай тус баримт бичигт тэмдэглэсэн байна.
Мөн “Монголын их өр нь хоёр улсын хоорондын хамтын ажиллагаа, хөрөнгө оруулалтыг гүнзгийрүүлэхэд гол саад тотгор болж байсан. Одоо Улаанбаатар хот ОХУ-д 3.8 сая долларын өр төлөх ёстой” хэмээн бичжээ гэж мэдээлжээ.