Монголчуудын давсны хэрэглээг 30 хувиар бууруулахаар хэлэлцэв

“Давс ихтэй хүнсний үйлдвэрлэл, худалдаа, хэрэглээг бууруулах эрх зүйн орчин, шийдвэр гаргагчдын оролцоо дэмжлэг” сэдэвт хэлэлцүүлэг өнөөдөр Эрүүл мэндийн яамнаа боллоо.

Уг хэлэлцүүлэгт ЭМЯ-ны Бодлогын хэрэгжилтийг зохицуулах газрын дарга Я.Буянжаргал, Үйлдвэр, хөдөө аж ахуйн яамны Стратеги, бодлого төлөвлөлтийн газрын дарга Л.Чой-Иш, ҮХААЯ-ны Хүнсний үйлдвэрлэлийн БХЗГ-ын дарга Ц.Нандинжаргал, ДЭМБ-ын Монгол дахь Суурин төлөөлөгч Др.Су Нюунт У, ҮХААЯ-ны Хүнсний аюулгүй байдлын мэргэжилтэн А.Амаржаргал, МХЕГ-ын Хүнсний үйлдвэрлэл, үйлчилгээний хяналтын хэлтсийн дарга Л.Гэрэлмаа, Үндэсний аюулгүй байдлын зөвлөлийн ажлын албаны хүнсний асуудал хариуцсан референт Д.Энхмаа, ШУТИС-ийн Хүнсний үйлдвэрлэлийн сургуулийн захирал н.Туяацэцэг, НЭМГ-ын НЭМХ-ийн дарга н.Хулан, Нийгмийн эрүүл мэндийн үндэсний төвийн захирал Ө.Ганчимэг, Стандартчилал хэмжил зүйн газрын мэргэжилтэн Б.Даваасүрэн болон албаны бусад хүмүүс оролцов.

Энэхүү хэлэлцүүлгээр “Чимх давс” туршилтат хөтөлбөрийн үр дүнг хэлэлцэхийн зэрэгцээ давсны хэрэглээг бууруулах үндэсний стратегийн зорилт болон түүнийг хэрэгжүүлэх арга зам, Монгол улсад хэрэглэгддэг савласан хүнсний бүтээгдэхүүний шошгонд тавигдах ерөнхий шаардлага зэрэг олон асуудлыг ярилцсан юм.

“Амьдралын буруу хэвшлээс үүдэлтэй өвчнөөс сэргийлэх, хянах” үндэсний хөтөлбөрт хүн амын давсны хэрэглээг бууруулах стратегийг боловсруулан батлуулах тухай тусгасан байдаг ч давсны хэрэглээг бууруулах асуудал нь худалдаа, хүнс хоол үйлдвэрлэл, импорт, боловсрол, эрүүл мэнд зэрэг олон салбарын хамтын ажиллагааны дүнд хэрэгжих боломжтой бөгөөд тодорхой зардал шаардлагатай ажил юм.

Иймд давсны хэрэглээг бууруулах асуудлыг хөтөлбөрийн түвшинд ярих шаардлагатай учир “Хүн амын хоол тэжээлийн үндэсний хөтөлбөр”-ийн дэд хөтөлбөр болгон боловсруулан батлуулж, хэрэгжүүлэх нь зүйтэй хэмээн мэргэжилтнүүд үзсэн байна.

2025 он гэхэд Монголын хүн амын давсны хэрэглээг одоо байгаа түвшингээс 30 хувиар багасгана гэсэн зорилгыг энэ хөтөлбөртөө тусгахаар болсон байна.

Хөтөлбөрийн зорилтуудыг 3 үндсэн чиглэлд хэрэгжүүлнэ. Үүнд:

Нэгдүгээрт Давсны хэрэглээг бууруулах эрх зүйн орчныг бий болгох:

Энэ хүрээнд нийтийн хоол, хүнс үйлдвэрлэлд мөрдөх давстай холбогдох стандартуудыг шинээр боловсруулах батлах, бүтээгдэхүүний давсны агууламжийн хязгаар тогтоох, холбогдох хуулиудад нэмэлт оруулах, шинэ заавар журам мөрдүүлэх зэрэг ажлуудыг төлөвлөж байна.

Хоёрдугаар зорилтын хүрээнд хүнсний тогтолцоон дахь давсны хэрэглээг бууруулахтай холбогдох үр дүнтэй, тохирох интервенцүүдийн хэрэгжилтийг хангах, эрчимжүүлэх, хэрэгжилтийг хянах зэрэг ажлуудыг төлөвлөж байна.

Гуравдугаар зорилтын хүрээнд үйлдвэрлэгчид, хэрэглэгчдийн давсны хэрэглээтэй холбогдох мэдлэгийг сайжруулах, хор аюулыг ойлгуулах, сурталчлах зэрэг ажлуудыг төлөвлөж байна.

Хүүхдийн хүнсэнд давсны хэрэглээг бага байлгах, импортын хүнсэнд давсны зөвшөөрөгдөх дээд хэмжээг заах, илүүдэл давсны хэмжээг татварын зохицуулалтаар шийдвэрлэх, нийтийн хоол үйлчилгээг эхлүүлэх шаардлага нөхцлийг заах гэх мэт санал санаачлагууд өнөөдрийн хэлэлцүүлгийн явцад яригдлаа.