-МОНГОЛ ТУУРГАТНЫ ШИЛДЭГ МИСС ЭНЭ САРЫН 27НД ТОДОРНО-
“Дэлхийн Монголчуудын Глобал Нийгэмлэг”-ээс зохион байгуулж буй “Монгол туургатны мисс”-ийн тэмцээн Улаанбаатар хотноо үргэлжилж байна. Халимаг, Тува, Буриад, Өвөрмонгол, Монголын төлөөлөл 20 бүсгүй оролцож буй бөгөөд тэмцээнийг Мисс модель, Мисс фото, Мисс авьяас, Мисс бикини, Мисс үндэсний хувцас, Мисс гүүдвил гэсэн зургаан төрлөөр явуулж, олон улсын миссийн тэмцээний жишгээр шилдгүүдийг шалгаруулах юм.
Тус тэмцээний “Мисс Гүүдвил” номинацийн хүрээнд “Сүүн дусал” сайн үйлсийн аян зохион байгуулагдах болсоноо өнөөдөр хэвлэлийнхэнд мэдээлэл өглөө. Аянаар Хоёрдугаар амаржих газрын нярайн тасгийг олон улсын стандартын дагуу тохижуулах аж. Тус аянд Монголын үндэсний томоохон үйлдвэрүүдтэй хамтран зураг төслийг нь гарган ажиллаж байгаа бөгөөд нэг өдрийн цалингаа хандивлаж байгаа юм. Тасгийг тохижуулахад нийт 32 сая төгрөг шаардлагатай байгаа ч одоогоор 10 гаруй сая төгрөг цугларсан байна. Хандивыг өнөөдөр тус амаржих газрын удирдлагуудад хүлээлгэн өгөх юм байна.
Тэмцээний эцсийн шалгаруулалт 27-нд “Сorporate hotel and convention centre”-т 19:00 цагаас болно.
Ж. Хулан