“Өдрийн сонин”-ы бямба гаригийн дугаар 12 нүүрээр хэвлэгдэн, уншигч та бүхний гар дээр очлоо. Өдрийн сурвалжлагаа Монголын үндэсний музейд өчигдөр нээлтээ хийсэн “Монгол тамга” үзэсгэлэнгээс бэлтгэлээ. Тус үзэсгэлэнд үе үеийн Монголын төрийн тэргүүнүүдийн хэрэглэж байсан тамга сэлтээс гадна 13 дугаар зууны үеийн тамга тэмдгийн дардас бүхий захидал хүртэл дэлгэгджээ. “Нэг ангийнхан” буланд Сүхбаатар аймгийн бүрэн дунд сургуулийг 1973 онд төгссөн ангийнхнийг онцлон орууллаа. Учир нь эдний ангиас хоёр гавьяат, хоёр доктор, хориод алтан гадас одонт шагналтнууд төрөн гарчээ. “Монгол мөрөөдөл”-ийг хэн бүтээх вэ? нийтлэлд “… монгол мөрөөдөл ямар байхыг хамтдаа төсөөлөөд үзье. Бид мөрөөдлөө яаж харах ёстой юм бол гээд харахаар ядаж л хоёр өрөө тохилог сууц, хэрэглээндээ уначих машин, тогтмол дажгүй орлого, мэдээж эрүүл амьдрах зөв орчин хэрэгтэй. Орон сууцныхаа зээлд өнөөдрийнх шиг олдог мөнгөнийхөө талаас илүүг биш, арваас хорин хувийг зардаг болчихвол монгол мөрөөдлийн нэг мөчир цэцэглээд ирчихнэ…” хэмээн бичсэний дэлгэрэнгүйг өнөөдрийн “Өдрийн сонин”-ны гуравдугаар нүүрнээс уншаарай. Барилга хот байгуулалтын яамны Төрийн нарийн бичгийн дарга асан Р.Эрдэнэбүрэн, “Цахилгаан дамжуулах үндэсний сүлжээ” ТӨХК-ын захирал асан Ж.Равдандорж нарыг бусдаас их хэмжээний мөнгө хахуулиар авсан байж болзошгүй гэсэн үндэслэлээр шалгах болсон талаарх дэлгэрэнгүй мэдээллийг сонины долдугаар нүүрт хэвлэгдлээ.
“Өд бэх” буландаа СГЗ, Д.Нацагдоржийн нэрэмжит шагналт С.Пүрэвийн “Азын цэнхэр уулс” өгүүллэгийг оруулсан бол “Ном ярьж өгье” буландаа Шведийн зохиолч Стиг Ларсоны “Луу шивээст охин” хэмээх адал явдалт зохиолыг онцоллоо. Үүнээс гадна цаг үеийн мэдээ мэдээллүүд мэдээж манай өнөөдрийн дугаарт багтсан.