Их эзэн Чингис хааны мэндэлсэн өдрийг Монгол бахархлын өдөр болгон тэмдэглэж буй юм. Тус өдөр өвлийн тэргүүн сарын шинийн нэгэн буюу өнөөдөр тохиож байна.
-10.00 цагаас Төрийн далбаа мандуулах ёслол, 10.40 цагаас Төрийн есөн хөлт их цагаан туг цэнгүүлэх ёслол Чингис хааны нэрэмжит талбайд тус, тус болно.
-Төрийн тэргүүн зэргийн одон “Чингис хаан” одон гардуулах ёслол 11:40 цагаас Төрийн ёслол хүндэтгэлийн их танхимд болно. “Чингис хаан” одонгоор энэ удаа зохиолч, яруу найрагч, малчин ардын хүү Гомбожавын Мэнд-Ооёо хүртэж буй юм.
-Улс, аймгийн алдар цолтой хүчит 128 бөхийн барилдаан Монгол бөхийн өргөөнд 14:00 цагаас тус тус болно.
Монгол бахархалын өдрийг 2012 онд анх удаа тэмдэглэхэд Улс, аймгийн алдар цолтой хүчит 128 бөхийн барилдаанд Архангай аймгийн Хашаат сумын харъяат, улсын заан Ч.Санжаадамба түрүүлж, Хөвсгөл аймгийн Тосонцэнгэл сумын харъяат улсын харцага Ц.Содномдорж үзүүрлэсэн юм.
2013 оны энэ өдрөөр улсын заан Ч.Санжаадамба хоёр дахь удаагаа түрүүлж, Увс аймгийн Баруунтуруун сумын харъяат, улсын аварга С.Мөнхбат үзүүрлэсэн юм.
2014 оны энэ өдөр Увс аймгийн Улаангом сумын харъяат, улсын харцага Ө.Бат-Орших түрүүлж, Увс аймгийн Баруунтуруун сумын харъяат, улсын аварга С.Мөнхбат үзүүрлэжээ.
Мөн 2015 оны 11 дүгээр сарын 13-ны өдөр 11:40 цагаас Монгол Улсын Ерөнхийлөгчийн санаачилгаар уламжлал болгон зохиож буй “Мөнх тэнгэрийн бичиг” монгол бичгийн үзэсгэлэнгийн нээлт Монголын Уран зургийн галерейд болно. Үзэсгэлэн 2015 оны 11 дүгээр сарын 13-наас 11 дүгээр сарын 17-ны өдрүүдэд үнэ төлбөргүй юм байна.