Жил бүрийн хоёрдугаар сарын 23-нд Орос улсад “Эх орноо хамгаалагчдын өдөр” буюу Оросын цэргийн баярыг тэмдэглэдэг. Энэ баярыг тохиолдуулан өнөөдөр /2019.02.22/ ЗХУ-ын дөрвөн удаагийн баатар, Монгол Улсын баатар, Маршал Г.К.Жуковын хөшөөнд цэцэг өргөх ёслол боллоо. Энэ жилийн цэцэг өргөх ёслолд Батлан хамгаалах яамны сайд Н.Энхболд тэргүүтэй салбар яамны төлөөлөл, Зэвсэгт хүчний жанжин штабын удирдлагууд, Монгол Улсад суугаа Элчин сайд И.К.Азизов болон Монголд ажиллаж, амьдарч буй ОХУ-ын иргэдийн төлөөлөл оролцсон юм.
Цэргийн баярыг ОХУ-д 1918 оноос эхлэн тэмдэглэж ирсэн билээ. Энэ өдрийг тохиолдуулан Москва хот болон Оросын олон хотод ёслолын жагсаал, үзэсгэлэн, концерт, баярын үйл ажиллагаанд зориулсан театрчилсан тоглолтууд болж, ОХУ-ын Зэвсэгт хүчний нэгдэл, хэсгүүдэд хоёрдугаар сарын 23-нд ёслолын жагсаал хийдэг.
Ийн ахан дүүсийн холбоотой манай хоёр улсын хувьд жил бүрийн энэ өдөрт зориулж Монгол Улсын газар шороо тусгаар тогтнолын төлөө амь биеэ үл хайрлан тэмцэж явсан Зөвлөлтийн дайчдадаа хүндэтгэл үзүүлж ирсэн уламжлалтай билээ.