МАХН-аас дөнгөж сая мэдээлэл хийж, Ерөнхийлөгчийн сонгуулийн дүнг хүлээн зөвшөөрөхгүй гэдгээ мэдэгдлээ. Хэвлэлийн хуралд МАХН-аас Ерөнхийлөгчийн сонгуульд нэр дэвшсэн С.Ганбаатар, Ерөнхийлөгчийн сонгуулийн штабыг удирдсан Ц.Оюунбаатар, тус намын гишүүн Ц.Шаравдорж, С.Удвал нар ирсэн юм.
Нэр дэвшигч С.Ганбаатар хэлэхдээ: СЕХ илбэчин байгууллага болжээ. 35 мянган амьгүй албатыг бий болгосон байна. Хоёрхон өдрийн дотор 35 мянган хүмүүсийг шинээр бий болгосон байна. Тэгэхээр монголчууд аа, та бид өнөөдөр тусгаар тогтнол, мандан бадрал, язгуур эрх ашгийнхаа төлөө энэ хууль бус, ёс зүйгүй зүйлтэй эвлэрч болохгүй ээ. СЕХ-ны шийдвэр луйвар, илбэ байсан гэдгийг бид баримтаар баталж чадна. Тиймээс энэ сонгуулийн дүнг хүлээн зөвшөөрч болохгүй, тэднийг луйвар хийхийг нь амташуулж болохгүй. Бид олон жил давруулсан. МАХН-аас дэвшүүлсэн мөрийн хөтөлбөрт олон ажлын байр шинээр бий болгохыг тусгасан. Тэр төлөвлөгөө, мөрийн хөтөлбөрийнхөө төлөө үүнийг хүлээн зөвшөөрч болохгүй. СЕХ-г Монголын ард түмний өмнө үнэн мөнөөрөө ажилладаг болтол нь тууштай тэмцэнэ. Эцэст нь биднийг дэмжсэн сонгогч түмэн олондоо баярлалаа. Бид үндсэндээ ялсан” гэсэн юм.
Түүнчлэн энэ бол зөвхөн С.Ганбаатарын сонгуулийн үйл ажиллагаа байсангүй ээ. Монголын ард түмний сонгууль байсан шүү. Бид хамгийн цэвэр өрсөлдсөн. Манай сонгуулийн кампанит ажил хувь хүний цусны асуудал, гэр бүлийн асуудал дээр нэг ч үг дуугараагүй шүү гэсэн юм.