Шинэчлэлийн Засгийн газраас хэрэгжүүлсэн “Нүүрс” хөтөлбөрийг зохион байгуулж ажиллахдаа албан тушаалаа урвуулан ашиглаж, улсад хохирол учруулсан гэх Л.Гансүх нарт холбогдох хэргийг Баянзүрх, Сүхбаатар, Чингэлтэй дүүргийн шүүхэд дөрвөн өдөр хэлэлцсэн билээ.
Тэгвэл түр завсарласан шүүх хурал маргааш дахин үргэжлүүлэх юм.
461 дүгээр ангид хаалттай хэлэлцэхээр товлогдсон байсан шүүх хурал Л.Гансүх нарын хүсэлтээр нээлттэй болж байгаа. Олны анхаарлын төвд байгаа энэхүү шүүх хуралд Монгол Улсын Ерөнхий сайд асан Н.Алтанхуяг, “Багануур” компанийн гүйцэтгэх захирал М.Отгонбаяр болон энэ хэрэгт аудитаар болон шинжээчээр ажилласан хүмүүс, гэрч, хохирогч нар мэдүүлэг өгөөд байгаа юм.
Дөрвөн өдөр үргэлжилсэн шүүх хурал нэлээд ширүүхэн өрнөж байгаа бөгөөд шүүгдэгчдийн өмгөөлөгчид шүүгч хурлыг даргалагч Х.Идэр болон улсын яллагчаар ажиллаж байгаа прокурорууд, шинжээчдээс татгалзах хүсэлт тавьсан ч шүүх бүрэлдэхүүн хүлээж аваагүй юм.
Олон нийтийн анхаарлыг төв байгаа энэ хэргийн үнэн мөнийг зөвхөн шүүх тогтоох учиртай. Нээлттэй болж байгаа шүүх хурлын явцаас иргэд энэ хэргийн талаар өөр өөрийн байр суурийг илэрхийлээд байгаа юм. Тухайлбал, “Хохирогчгүй шүүх хурал болж байна”. “Л.Гансүх нарыг шударгаар шүүх ёстой”, “Хохирогч хэмээгдээд байгаа Багануурын өмнөөс АТГ юуны учир хөдлөв”, “Шинжээч нарын мэдлэг боловсрол хангалтгүй байна” гэх зэргээр байр сууриа илэрхийлж байна.