Эрдэмтэд хүний биеийн дархлааны нийт эсийн тоо, жинг анх удаа судлан тогтоожээ. Израилийн Вейцманы нэрэмжит Шинжлэх ухааны хүрээлэнгийн эрдэмтэн Рон Майло "Дархлааны тогтолцоо гэдэг нь дор бүрнээ чухал үүрэгтэй олон төрлийн эсүүдээс бүрддэг цогц тогтолцоо юм. Тухайлбал, цусны цагаан эс гэх лимфоцитууд нь вирус болон бусад эмгэг үүсгэгч гадны биетүүдийг устгадаг. Харин тулгуур эсүүд нь бэртэл авсан үед үүсэх үрэвслийг устгаж, эд эрхтэний бүрэн бүтэн байдлыг хянадаг" хэмээн ярьжээ. Майло болон түүний багийнхан өмнө нь хийсэн судалгаануудыг ашиглан хүний биеийн янз бүрийн эдэд дархлааны хэчнээн эс агуулагдаж байгааг тооцоолж, дараа нь ижил насны хэд хэдэн эрэгтэй, эмэгтэйчүүд, 10 настай хүүхдүүдээс авсан эсүүдэд хийсэн лабораторын дүнг нэгтгэн дүгнэсэн байна.
Ингэснээр судалгааны багийнхан 20-30 насны 73 кг жинтэй эрэгтэй хүний дархлааны тогтолцоо нь 1.2 кг жинтэй 1.8 их наяд орчим эсээс тогтдог болохыг тогтоожээ. Харин 60 кг жинтэй мөн насны эмэгтэйчүүд нийт 1 кг жинтэй 1.5 их наяд ширхэг дархлааны эстэй байсан бол 10 настай хүүхдүүдийн дархлааны тогтолцоо 0.6 кг орчим жинтэй, эсийн тоо 1 их наяд ширхэг байжээ. Эрдэмтдийн энэхүү судалгааны өгүүлэл “Proceedings of the National Academy of Sciences” сэтгүүлд нийтлэгдсэн байна.
Г.АМАРСАНАА