Мэргэжлийн сүмо бөхийн дээд амжилт, хамгийн олон түрүүгийн эзэн, 69 дэх их аварга Хакүхо М.Даваажаргал өнөөдөр Төв аймгийн Зуунмод хотноо нутгийн зон олонтойгоо Хөдөлмөрийн баатар цолоо тэмдэглэж, наадам хийж байгаа билээ. Энэ сарын нагоя башёд түрүүлж, 35 дахь түрүүгээ хүртсэн тэрбээр даваа гарагийн орой эх орондоо ирсэн юм.
Энэхүү наадамд их нас, даага насны шандаст хүлгүүд хурадаллаа. Мөн хүчит 128 бөх зодоглосноос Улсын гарьд Б.Гончигдамба түрүүлж, Улсын заан Ч.Санжаадамба үзүүрлэсэн юм. Мөн өнөөдөр болж буй наадам, ёслолын үеэр Их аваргын гэргий Саёоко Вадагийн санаачилгаар Төв аймгийн эрүүл мэндийн салбарт бүрэн тоноглогдсон түргэн тусламжийн автомашин гардуулж өгөв.