Түргэн хоолны KFC сүлжээ ресторан манай улсад албан ёсоор үйл ажиллагаагаа явуулаад цөөнгүй жил болж байна. Энэ утгаараа өнгөрсөн хугацаанд KFC-тэй холбоотой сайн, муу шүүмжлэлүүд иргэдээс гарсаар ирсэн. Саявтархан л гэхэд Монголд үйл ажиллагаа явуулж буй KFC сүлжээнийхэн Хятадын Шандонг мужаас хорт хавдар үүсгэдэг байж болзошгүй тахиа оруулж ирж байгаа тухай мэдээлэл цахимаар цацагдсан нь иргэдийг сэртхийлгэсэн юм.
Тэгвэл 3,4 дүгээр хорооллын Өргөө кино театрын зэргэлдээ байрлах KFC сүлжээ ресторантой холбоотой дахин нэг шүүмжлэл гарлаа. Учир нь тус рестораныхон өөрсдийн хэрэглэсэн хогоо нийтийн эзэмшлийн талбайд ил задгай хаясан тухай баримтыг нэгэн фэйсбүүк хэрэглэгч зурагжуулан цахим хуудастаа дэлгэжээ.
Оршин суугчдын мэдээлж байгаачлан энэ нь зөвхөн ганц удаагийн үйлдэл биш бөгөөд хорооллын KFC сүлжээнийхэн энэ мэтээр удаа дараалан хогоо ил задгай хаяж байсан талаар гомдоллож байгаа юм.