Монгол Улсын Засгийн газраас жил бүрийн хавар эдийн засгийн чуулга уулзалт зохион байгуулдаг уламжлалтай. Энэхүү чуулганыг өнгөрсөн гуравдугаар сарын 30, 31-ний өдрүүдэд хийх ёстой байсан ч хойшлуулж, тавдугаар сарын 18, 19-нд зохион байгуулахаар болсон. Тэгвэл энэ удаа дахин хойшлуулсан юм. Энэ талаар УИХ-ын гишүүн, Засгийн газрын хэрэг эрхлэх газрын дарга Ж.Мөнхбат өнөөдөр сэтгүүлчдэд мэдээлэл хийлээ.
Хойшлуулсан шалтгаан нь Монгол Улсын Засгийн газар Олон улсын валютын сан/ОУВС/-гийн хөтөлбөрт хамрагдахаар болж, 2017 оны төсвийн хуульд өөрчлөлт оруулсан. Гэвч УИХ-аас баталсан 29 дүгээр тогтоолын 11 дэх заалттай холбоотойгоор тус тогтоолд дахин өөрчлөлт оруулах шаардлага гарсан. Энэ асуудлыг УИХ өнгөрсөн долоо хоногт хэлэлцэн шийдвэрлэсэн.
Засгийн газрын хувьд тавдугаар сарын 12-ны өдрийн ОУВС-гийн захирлуудын зөвлөлийн хуралдаанаас Монголын хүсэлтийг хэлэлцэнэ гэсэн хүлээлт байсан ч тавдугаар сарын 24 болж хойшлогдсон аж. Эдийн засгийн форумыг дээрх хөтөлбөрт хамрагдсаны дараа зохион байгуулах шаардлага үүсэж буй учраас ирэх зургадугаар сарын сүүл, долдугаар сарын эхээр товлох нь зөв гэж үзжээ.
Хөрөнгө оруулагчдын хувьд Монгол Улс ОУВС-гийн хөтөлбөрт хамрагдах нь уу гэдгийг мөн анхааралтай ажиглаж буй юм байна. Үүнийг дагаж ирэх жилүүдэд Монгол Улсад бизнес эрхлэх үү, яах вэ гэдэг шийдлүүд ч гарч ирэх болж байгаа аж. Мөн Ерөнхийлөгчийн сонгууль эхэлж байгаатай холбоотойгоор зургадугаар сард улстөржилт үүсэх эрсдэлтэй, нөгөө талаар тус форумыг илүү өгөөжтэй, үр дүнтэй болгох гэдэг шаардлагаар сонгуулийн дараа хийх нь илүү оновчтой гэж үзсэний үндсэн дээр тэрхүү товыг тогтоожээ.
Дээрх мэдээллийн дараа сэтгүүлчдийн сонирхсон асуултад хариулт өгөв.
-Засгийн газрын хуралдаанаар өчигдөр зээлийн асуудал хэлэлцэн шийдвэрлэсэн. Юунд зарцуулах зээл вэ?
-Энэтхэг улсаас хөнгөлөлттэй нөхцөлөөр олгох 1 тэрбум ам.долларын зээлтэй холбоотой асуудал байгаа. Юу, юунд зарцуулах вэ гэдгийг ерөнхийд нь хэлэлцээд Сангийн сайдад хэлэлцээ хийх эрхийг өгсөн. Хоёр дахь гол шийдвэрлэсэн асуудал нь иргэдийн явган аялалтай холбоотой. Иргэд Богд уул руу явган аялал их хийдэг болсон. Авто машины зогсоол, дугуйн зогсоол байдаггүйгээс айлын гадаа авто машин, дугуйгаа тавиад алхдаг нөхцөл үүссэн. Тийм учраас Богд уулын тодорхой газарт авто машин, дугуйн зогсоол байгуулах шийдвэр гаргасан байгаа.