Монголын анхны олон улсын магадлан итгэмжлэгдсэн эмнэлэг болох шалгуурыг “Интермед” эмнэлэг амжилттай давжээ. Тодруулбал, Чикаго хотод төвтэй дэлхийн 100 гаруй орны эрүүл мэндийн байгууллагатай хамтран ажилладаг “JIC” байгууллагын магадлан итгэмжлэлийн шинжээчид наймдугаар сарын 15-19-ний өдрүүдэд тус эмнэлэгт ажилласан байна.
“JIC” байгууллага нь хүн бүрт чанарын өндөр түвшинд эрүүл мэндийн тусламж үйлчилгээг үзүүлэхийг эрхэм зорилгоо болгосон аж. Тэд энэ зорилгоо биелүүлэх хамгийн оновчтой арга бол магадлан итгэмжлэл гэж үздэг байна. Энэ хүрээнд үйлчлүүлэгчийн аюулгүй байдлыг дээд зэргээг хангасан, тусламж үйлчилгээний чанарыг тогтвортой сайжруулахад чиглэсэн бүлэг стандартыг тогтмол боловсруулан гаргадаг байна. Эдгээр бүлэг стандартыг мөрдөн ажиллаж чадсан эрүүл мэндийг байгууллага “JIC” магадлан итгэмжлэлийн шалгалтыг амжилттайгаар давж, цаашид үргэлжлүүлэн стандартын дагуу үйл ажиллагаагаа явуулах хатуу үүргийг хүлээдэг байна. Сонирхуулахад “JIC” байгууллага нь дэлхийн 60 гаруй орны 800 гаруй шилдэг эмнэлэгт магадлан итгэмжлэл олгосон олон улсын нэр хүнд бүхий байгууллага ажээ.
