Илүүдэл жин хүүхнүүдийн ярианы гол сэдэв. Илүүдэл жинтэйгээ хамт зарим нь өөрийгөө үзэн ядах шахах юм. Жингээ хянаж чадаагүй нэг эмэгтэй илүүдэл жинтэйгээ найзалжээ. Масс ихтэй ч эвлэгхэн бүжиглэх тэрбээр интернэтийн шинэ од болчихож. Илүүдэл жин гэдэг асуудал мөн ч байнга түүндээ анхаарал хандуулаад, зүсэм бялуу идсэн ч айдастай явах нь эргээд таргалалтын шалтгаан болдог аж.
Стресс гэдэг жин нэмэгдүүлэх гол сэжим болчихдог юм байна. Тийм учраас хааяа амттан идэхдээ айх хэрэггүй. Амттан аз жаргалын мэдрэмж авчирдаг гэдэг шүү дээ. Хөхүүл хүүхэдтэй хүүхнүүд хүртэл элдэв тураах бэлдмэл эрж сурна. Хүүхдэд сөрөг нөлөөтэй юм идэж уухгүйгээр жингээ хянах энгийн арга байж л таарна. Эдийн засгийн хямрал нүүрлэсэн ч хүн ам маань таргалалтын синдромтой болчихож. Үнэндээ хоёр хүний нэг нь илүүдэл жинтэй гэсэн судалгаа бий.
Жингээ хасах гэж хамаг мөнгөө үрэхийн оронд мөнгөө хэмнэх замаар турж болох шүү дээ. Наад зах нь хот дотор унаа машинаас татгалзаарай. Гучин хором алхахад жингээ барихад хялбар болно. Өөх тостой, цагаан гурилтай хоол хүнснээс татгалзаж, хоолоо багасгах хэрэгтэй. Нас ахих тусмаа хүн жин нэмэх хандлагатай байдаг. Тийм учраас залуудаа идэж байсныхаа хагас хугасыг л шингээж чадна гэдгээ санаарай.
Орой 18 цагаас хойш хоол идэхгүй гэдэг чихрийн шижинтэй хүмүүсийн баримталдаг зарчим жин ихтэй хүмүүст ч хамаатай. Орой юм идмээр санагдвал байцаа, лууван хүрэн манжингийн салат, эсвэл аяга тараг, ширхэг алим гэх мэт гэм хоргүй юм идчих. Дасгал хөдөлгөөн хийхээ мартаж болохгүй. Хамгийн гол нь илүүдэл жиндээ хэт бүү анхаар. Эмзэг цэгтээ бус сайн талдаа илүү анхаарвал амьдрал хялбар бус уу.