Йемений босогчид нийслэл Сана дахь “Yemen Today” телевизийн байрыг арванхоёрдугаар сарын 2-нд эзлэх үеэр албаа гүйцэтгэж байсан 41 сэтгүүлчийг барьцаалжээ. Тэдний дунд ОХУ-ын Спутник агентлагийн салбарын орон тооны бус сурвалжлагч ч байгаа аж. Саяхан шийтийн босогчид Ерөнхийлөгч асан Салех алагдсан талаарх дүрс бичлэгийг интернэтэд тавьсан. Гэвч төрийн тэргүүнийг дэмжигчид хуситуудыг худал цуурхал тараасан гэж мэдэгдэж байв. Ройтерс агентлаг ч мэдээлснээр Йемений Ерөнхийлөгч асан амь үрэгдсэнийг мөн баталжээ. Зарим эх сурвалжийн онцолж буйгаар хуситууд экс Ерөнхийлөгчийг Маариб мужаас Санхан тосгон руу нэвтрэх гэж байхад нь буудаж хөнөөсөн гэж мэдээлж байв. Түүний сууж явсан машин халдлагад өртөх үед сум толгойн тус газар нь туссанаар Салех амиа алджээ. Мөн нь Йемений Ерөнхийлөгч асны Сана хот дахь өргөө дэлбэрэлтэд өртсөн талаар урьд нь мэдээлж байв.Йемений Ерөнхийлөгч асан энэ сарын 2-нд ард иргэддээ хандан үг хэлэхдээ улс орноо хуситуудаас хамгаалахыг уриалж байжээ.
Тэрбээр засгийн газрын эсрэг жагсаалаас үүдэн 2011 онд огцорч байв. Үүний дараа тус улсад тогтворгүй байдал үүссэн гэдэг. Тухайн үед жагсагчид шинэчлэл хийхийг шаардаж байжээ. Нэг жилийн хугацаанд 2000 орчим хүн амиа алджээ. 2014 онд тус улсад хуситууд мөн эсэргүүцлийн жагсаал хийх болсон. Улмаар жагсаал мөргөлдөөнд хүргэсэн билээ. Хуситууд 2015 онд нийслэл Санаг хяналтдаа авч, парламентыг тараажээ. Мөн Засгийн газрыг татан буулгаж, тухайн үеийн Ерөнхийлөгч Абда Раббо Мансуро Хадиг огцруулж байв.
Хамгийн сүүлийн мэдээгээр өнгөрсөн даваа гаригт болсон мөргөлдөөнд 247 хүн амиа алджээ. Бусдын гарт амиа алдсан Ерөнхийлөгч Салехын хүү Ахмад али Салех эцгийнхээ өшөөг авахаа амлаад байна. Тэрээр мэдэгдэхдээ “Сүүлчийн сунит Йемен улсыг орхих хүртэл бид тэмцлээ үргэлжлүүлнэ” гэж мэдэгджээ.