Гадаадын хамтлаг дуучид, манай улсад уран бүтээлээ хийх нь их билээ. Тэр дундаа байгалийн өвөрмөц тогтоцтой газарт, өөрийн уран бүтээлээ хийхээс гадна газар үзэж, тухайн улсын нийгэм, соёл урлагийн тухай мэдэж авах зорилгоор ирдэг аж. Тухайлбал өнгөрөгч долоодугаар сард Франц улсын дуучин Петит Меллер шинэ дууныхаа клипний зураг авалтыг Хөвсгөл аймагт хийжээ. Тэрээр “The Flute” буюу “Лимбэ’ нэртэй дууныхаа клипийг манай улсад хийж, энэ сарын 19-нд олон нийтийн хүртээл болгосон байна. Этгээд сонин хувцаслаж, “хацар өнгөлөгчөө хэтрүүлдэг” франц бүсгүйд Хөвсгөл нутгийн охидын төрөлхийн улаа бутарсан хацарны талаар өөрийн хуудаснаа дурджээ. Уг клипийг “youtube” хуудаснаас гурван өдрийн турш 64 мянган хүн орж үзжээ. Дуучин Петит Меллер “шинэ поп” урсгалаар уран бүтээлээ туурвидаг ажээ.