Харилцаа холбооны зохицуулах хорооны удирдлагын урилгаар манай улсад Фэйсбүүк компанийн Ази, Номхон далайн бүсийн төлөөлөгчид ажиллаж байна.
Уулзалтаар Фэйсбүүк компанийн олон нийтийн стандартын танилцуулгыг хийж, талууд хувь хүний эрх, эрх чөлөөг хангах, хувийн нууцлалыг хамгаалах, хууль бус аливаа үйл ажиллагаатай хамтран тэмцэх талаар санал солилцсон юм. Мөн “Бүс нутгийн аюулгүй байдал, хувийн нууцлал”, Монгол дахь бизнесийн орчныг дэмжих болон бусад асуудлаар зөвшилцсөний үр дүнд Монгол Улс Фэйсбүүк компанитай хамтран ажиллах санамж бичиг байгуулахаар боллоо.
Монгол Улс Фэйсбүүк компаниас гаргасан “Хамрагдах интернетийн индекс-2018” судалгааны affordability (хэрэглээ) үзүүлэлтээр Ази тивд нэгдүгээрт, дэлхийд 10-т жагсчээ.
Мөн өнөөдөр Засгийн газрын тэргүүн Фэйсбүүк компанийн Ази, Номхон далайн бүсийн төлөөлөгчдийг хүлээн авч уулзах юм байна. Манай улсын нэг сая гаруй иргэн Фэйсбүүк ашигладаг гэсэн судалгаа байна.