Олон улсын жүдо бөхийн холбооны Гранпри тэмцээн өчигдөр БНСУ-ын Чэжү хотноо эхэллээ. Тус тэмцээнд 42 орны 276 жүдоч (эрэгтэй 152, эмэгтэй 124) оролцож байна. Тэмцээний эхний өдөр буюу өчигдөр(11.27) эрэгтэйчүүдийн 60, 66 кг, эмэгтэйчүүдийн 48, 52, 57 кг жингийн барилдаан болж, медальтнууд тодорлоо.
Манай улсаас шигшээ багийн дасгалжуулагч Г.Дашдаваа, Ш.Цэвэлмаа нарын удирдлага дор эрэгтэй 11, эмэгтэй 5 жүдоч хүч үзэхээр Чэжүг зорьсон юм.
Тэмцээний эхний өдөр манай жүдочдоос эрэгтэйчүүдийн 60 кг-д Гавьяат тамирчин Д.Амартүвшин, ОУХМ Г.Хэрлэн нар хүрэл медаль хүртлээ. Мөн эмэгтэйчүүдийн 52 кг-д ОУХМ А.Цолмон V байрт, эрэгтэйчүүдийн 66 кг-д Б.Батгэрэл VII байр эзэллээ.
Эхний өдрийн дараах байдлаар 12 орноос ямар нэгэн медаль хүртээд байгаагаас Франц 2 алт, 1 мөнгөн медаль хүртсэн амжилтаар тэргүүлж байгаа бол Япон (1+2+0), БНСУ (1+1+1) улсууд удаалж байна. Манай улс хоёр хүрэл (V, VII) хүртсэн амжилтаар VII байрт бичигдэж байна.
Тэмцээний хоёр дахь өдөр буюу өнөөдөр эрэгтэйчүүдийн 73 кг, 81 кг, эмэгтэйчүүдийн 63 кг, 70 кг жингийн барилдаан болно.
Өнөөдөр манай таван жүдоч зодоглох юм.
Эрэгтэй:
73 кг:
Хөдөлмөрийн баатар, Гавьяат тамирчин Х.Цагаанбаатар
ОУХМ Г.Одбаяр
81 кг:
Н.Дагвасүрэн
Эмэгтэй:
63 кг:
ОУХМ Б.Мөнгөнчимэг
ОУХМ Ц.Цэрэнчимэд нар тус тус зодоглох юм.
Тэмцээн Улаанбаатарын цагаар 09.00 цагт эхлээд байна. Тэмцээний талаарх мэдээллийг эргэн хүргэх болно.
