“Дүнжингарав-2015″ хаврын төвийн бүсийн хурдан морины уралдаан өнгөрөгч хоёрдугаар сарын 28-ны өдөр Төв аймгийн нутаг Хүй долоо худагт болсон билээ. Уралдааны дараа азарга, соёолон насанд эрлийз адуу түрүүлж, айрагдсан тухай нэр бүхий уяачдаас гомдол саналыг зохион байгуулах хороонд хүргүүлээд байсан.
ММСУХ-ноос дээрхи гомдол саналыг судлан үзээд “Дүнжингарав-2015” уралдааны азарга, соёолон насанд түрүүлж айрагдсан морьдын амжилтыг түдгэлзүүлэхээр шийдвэрлэсэн байна.
Монголын морин спортын уяачдын холбооны Ерөнхийлөгч М.Энхболд өчигдөр буюу гуравдугаар сарын 13-ны өдөр тэргүүлэгчдийн хуралдаан зарлаж, дараах шийдвэрийг гаргажээ.
Үүнд:
Азарганд түрүүлж, айрагдсан:
1. Говь-Алтай аймгийн Баян-Уул сумын уугуул Монгол Улсын тод манлай уяач Давгадоржийн Цэрэнжигмэдийн зээрд,
2. Өмнөговь аймгийн Цогтцэций сумын уугуул Хүүгийн Түмэнбаярын хонгор,
3. Орхон аймгийн Баян-Өндөр сумын уугуул Монгол улсын алдарт уяач Дэмбэрэлийн Дэлгэрбаярын хонгор
4. Орхон аймгийн Баян-Өндөр сумын уугуул Гомбожавын Баярцогтын хүрэн,
Соёолон насанд түрүүлж, айрагдсан:
1. Өмнөговь аймгийн Даланзадгад сумын уугуул Бадамгаравын Бадраагийн хар
2. Булган аймгийн Гурванбулаг сумын уугуул Монгол улсын манлай уяач Дамбын Хишигжаргалын цагаан
3. Төв аймгийн Сэргэлэн сумын уугуул Монгол улсын манлай уяач Ононгийн Батбилэгийн зээрд
4. Төв аймгийн Баянцогт сумын уугуул Мөнхбатын Цэрэндамбын хээр соёолонг тус тус хасахаар санал нэгтэй шийдвэрлэлээ.
“Дүнжингарав-2015” хаврын төвийн бүсийн уралдааны азарганд:
1. Хөвсгөл аймгийн Мөрөн сумын уугуул Аймгийн алдарт Уяач Түвдэндоржийн Болдбаатарын халиун
2. Дундговь аймгийн Өлзийт сумын уугуул уяач Батсүхийн Наранхүүгийн “Монгол” хээр
3. Архангай аймгийн Өндөр-Улаан сумын уугуул уяач Шаравжамцын Бадамжунайн хүрэн
4. Дундговь аймгийн Адаацаг сумын уугуул уяач Хуягтбаатарын Лхагважавын ягаан
5. Дундговь аймгийн Эрдэнэдалай сумын уугуул уяач Дагвын Доржийн зээрд
“Дүнжингарав-2015” хаврын төвийн бүсийн уралдааны соёолон насанд:
1. Төв аймгийн Угтаал цайдам сумын уугуул уяач Баянжаргалын Баттөрийн халиун
2. Баянхонгор аймгийн Жаргалан сумын уугуул уяач Лхагважавын Алтанхуягийн сартай хар
3. Дундговь аймгийн Өлзийт сумын уугуул уяач Пунцагийн Эрдэнэчулууны хонгор
4. Говь-Алтай аймгийн Дарви сумын уугуул уяач Сосорбарамын Баттулгын хүрэн
5. Дундговь аймгийн Хулд сумын уугуул уяач Баярсайханы Лхагва-Очирын хүрэн соёолон тус тус түрүүлж, айрагдсан байна.
ММСУХ-ны Ерөнхийлөгч Миеэгомбын Энхболд энэхүү шийдвэрийг гаргахын сацуу хурдан морины уралдааны зохион байгуулалт, үүлдэрлэг байдлаар ялгах үйл ажиллагааг сайжруулан цаашид уяачдад чирэгдэл учруулахгүй байх, Монгол адуу болон эрлийз адууг ялган ангилж уралдуулах холбооны бодлого, шийдвэрийг хэрэгжүүлж, олон түмнээ хүндэтгэх, үлгэр дуурайлал болж ажиллахыг тэргүүлэгч гишүүд, салбар холбоодын тэргүүн, дэд тэргүүн, Монгол Улсын Тод манлай, Манлай, Алдарт цолтой болон нийт уяачдад үүрэг болгож, Уяачийн Ёс зүйн Дүрмийг яаралтай боловсруулан оруулж, батлуулахыг ММСУХ-ны Ёс зүйн зөвлөлд, хурдан морийг бүртгэлжүүлэх ажлаа эрчимжүүлэхийг холбогдох хүмүүст даалгасан байна.