Дундговь аймгийн удирдлага Монгол Улсын гурван сая дахь иргэнтэй хамгийн ойр цаг хугацаанд мэндэлсэн Ц.Азбаяр болон ойролцоо өдөр, цагт мэндэлсэн найман иргэндээ хонхтой бойтог, хонины ноосон өлгий, хундан цагаан хонь бэлэглэсэн байна. Ёслолын ажиллагаа энэ сарын 4-ний өдөр тус аймгийн Ёслол хүндэтгэлийн өргөөнд болжээ.
Дундговь аймгийн 44400 хүн амыг билэгдсэн 444 мянган төгрөг бүхий Капитал банкин дахь хадгаламжийн дэвтрийг мөн гурван сая дахь иргэний чацуутнуудад бэлэглэжээ. Гурван сая дахь иргэний нас чацуутан зургаан хүү, гурван охин Дундговь аймгийн Өлзийт, Гурвансайхан, Сайнцагаан, Дэлгэрхангай сумаас төрсөн байна.