Шинэ жилийн баярын өдрүүдэд хамгийн их завгүй ажиллаж байгаа хүмүүс бол онцгой байдлын албаныхан. Зам тээврийн осол аваар, золгүй байдлаар амиа алдагсад, цасан шуурганд төөрөгсөд зэрэг дуудлага нэлээд иржээ. Өчигдөр 14.55 цагт гэхэд “Сүхбаатар дүүргийн 10 дугаар хороо, Монгол гуравдугаар сургуулийн ард дулааны шугамын худагт хүн нас барсан байна, гаргаж өгч туслаач” гэсэн дуудлага онцгой байдлын албанд ирсэн байна.
Дуудлагын дагуу нийслэлийн Онцгой байдлын газрын Аврах ангийн албан хаагчид ажиллажээ. Харамсалтай нь талийгаачийн биед ямар нэгэн бичиг баримт байгаагүй тул нэр, нас, гэрийн хаяг тодорхойгүй байсан гэнэ. Ямартай ч насанд хүрсэн эрэгтэй хүний цогцос байсан бөгөөд харьяа дүүргийн цагдаагийн хэлтэст хүлээлгэн өгчээ.