Өчигдөр Улаанбаатар хотын Замын цагдаагийн газрын Мэдээлэл шуурхай удирдлагын хэлтэс нийт 376 дуудлага мэдээ мэдээлэл хүлээн авснаас зам тээврийн ослын 276 дуудлага бүртгэгдсэн байна. Үүнээс Хөдөлгөөний аюулгүй байдлын журмын эсрэг гэмт хэрэг 17 бүртгэгдэж 17 хүн хүнд хөнгөн гэмтсэн байна. Зам тээврийн осолд долоон хүүхэд өртсөнөөс сургуулийн өмнөх насны нэг, сургуулийн насны зургаан хүүхэд байжээ. Мөн согтуугаар тээврийн хэрэгсэл жолоодсон 80 жолоочийг илрүүлж гарч болзошгүй осол хэргээс урьдчилан сэргийлж ажилласан байна.
Тухайлбал Чингэлтэй дүүргийн нутаг Нуурын 12 дугаар гудамжинд Т.Королла маркийн М жолоочтой авто машиныг унадаг дугуйгаар зорчигч долоон настай эмэгтэй Х, таван настай Т нар нь мөргөж гэмтсэн байна. Тэд гудамжнаас гарч явахдаа замаар явж байсан машиныг анхаарал болгоомжгүйгээсээ болж мөргөж гэмтсэн байна.
Мөн Чингэлтэй дүүргийн нутаг Самбуугийн гудамж Чингэлтэй дүүргийн ЗДТГ-ын хойд замд Ниссан Ноте маркийн авто машины жолооч М нь явган зорчигч долоон настай эрэгтэй Ү-г мөргөж гэмтээжээ.
Урин дулааны цаг ирсэнтэй холбоотойгоор замын хөдөлгөөнд хүүхдүүд унадаг дугуйтай оролцох нь эрс нэмэгдэж үүнтэй холбоотой зам тээврийн осол гарч байна. Монгол улсын Замын хөдөлгөөний дүрэмд 14 наснаас доош насны хүүхдүүд унадаг дугуйгаар замын хөдөлгөөнд оролцохыг хориглох ба зөвхөн тусгайлан бэлтгэсэн зам, хүүхдийн тоглоомын талбай дээр зорчихыг зөвшөөрсөн байдаг. Унадаг дугуйн зам байхгүйгээс хүүхдүүд авто замыг сонгож хөдөлгөөнд оролцдог тул эцэг эхчүүд та бүхэн онцгой анхаарах хэрэгтэй байна. Эцэг эхчүүдийн хүүхдэдээ тавих хараа хяналт хангалтгүй байгаагаас хүүхэд зам тээврийн осолд олноор өртөх явдал нэмэгдэх хандлагатай байна. Замын хөдөлгөөнд хэрхэн аюулгүй ороцлох, хаана тоглож болох, хаана тоглохгүй байх талаар хүүхдэдээ байнга зөвлөмж өгч, анхааруулж байхыг Замын цагдаагийн газраас зөвлөж байна.