Монголын электрон спортын холбоо буюу MESA-гаас зохион байгуулж буй “MESA Pro Series DOTA2 Finals” тэмцээний хасагдах шат өчигдөр эхэлсэн.
Хасагдах шатны эхний тоглолт “Sable Hat” болон “Draingang” багуудын хооронд боллоо. Тойргийн тоглолтод дөрөвдүгээр байр эзэлсэн Draingang өрсөлдөгчөө хоёр тоглолтод буулган авснаар хагас шигшээ шатанд шалгарлаа.
Тэд хагас шигшээд Kobolds багтай тоглоно. Kobolds баг тойргийн журмаар тоглоход хоёрдугаар байр эзэлсэн юм.
“MESA Pro Series DOTA2 Finals” тэмцээний финалын шатанд нийт зургаан баг тойргийн журмаар тоглосноос нэг ч хожигдолгүй хамгийн өндөр оноо авсан “Lilgun” баг 10:0 амжилттайгаар Grand Final шат руу шууд шалгарсан.
Харин тэдний араас 8:2 амжилттай “Kobolds” баг хагас шигшээд шалгарсан бол “Sable Hat” болон “Draingang” багууд хагас шигшээ шатны төлөө хоорондоо тоглохоор болсон юм.
Тойргийн шатанд тавдугаар байрт орсон “Wanted” баг 500 мянган төгрөгийн шагнал болон “MESA League”-т орох эрхтэй үлдсэн.
Харин “Seventh Sense” баг зургаадугаар байраар тэмцээнээ дуусгасан билээ. “MESA Pro Series DOTA2 Finals” тэмцээний ялагч Олон Улсын электрон спортын холбоо буюу IESF-ын дэлхийн аварга шалгаруулах тэмцээнд оролцох эрхтэй болно.
IESF World Championship тэмцээн Израил улсын Эйлат хотноо арваннэгдүгээр сарын 14:19-ний хооронд зохиогдоно.