Үндэсний статистикийн хорооноос мэдээлэл хийж, 2017 оны эхний долоон сарын Монгол Улсын нийгэм, эдийн засгийн байдлыг илтгэв.
Дотоодын нийт бүтээгдэхүүн энэ оны эхний хагас жилийн байдлаар 7.6 их наяд төгрөгт хүрч, өмнөх оны мөн үеэс 5.3 хувиар өссөн болохыг тус хороо мэдээллээ. Энэхүү өсөлтөд аж үйлдвэр, барилгын салбарын нэмэгдэл өртөг 2.5 хувиар буурсан ч үйлчилгээний салбарын нэмэгдэл өртөг 7.9 хувь,
бүтээгдэхүүний цэвэр татвар 21.7 хувиар өссөн нь голлон нөлөөлжээ. Үүнээс харахад татварын орлого ахиу хэмжээгээр өссөн байгаа юм. Татварын ерөнхий газрын мэдээлснээр энэ оны эхний долоон сард улсын төсөвт 1.57 их наяд төгрөгийн татварын орлого төвлөрсөн нь өмнөх оны мөн үеэс 88 тэрбум төгрөгөөр нэмэгдсэн үзүүлэлт болжээ. Сүүлийн долоон жилийн эхний хагас жилийн үзүүлэлтийг харахад, ДНБ 2011 оны эхний хагас жилд хамгийн өндөр буюу 20 хувиар өсөж байсан. Харин өмнөх оны мөн үед 1.5 хувиар өсөж байжээ.
Эдийн засаг эхний хагас жилд 5.3 хувиар өсөхөд ОУВС-ийн хөтөлбөрийн нөлөө болон эрдэс бүтээгдэхүүн тэр дундаа нүүрсний экспорт огцом нэмэгдсэн нь нөлөөлсөн болохыг эдийн засагчид онцолж байгаа юм.
ОУВС-ийн “Өргөтгөсөн санхүүжилтийн хөтөлбөр”-ийн хүрээнд Монгол Улсад эхний ээлжинд 38.6 сая ам.доллар харин хоёрдугаар ээлжинд 100 сая ам.долларын санхүүжилт орж ирсэн билээ.
Экспорт 2017 оны эхний долоон сард өмнөх оны мөн үеэс 979.2 сая ам.доллараар өсжээ. Үүнээс нүүрсний экспорт 1.4 тэрбум ам.доллар хүрсэн нь өмнөх оны мөн үеэс 4.2 дахин өссөн үзүүлэлт болж байна.
УИХ дахь Ардчилсан намын бүлгийн өнөөдрийн хуралдаан 11.30 цагт эхлээд, 15.30 цагт түр завсарлав. УИХ-ын чуулган завсарлаад байгаа ч УИХ дахь АН-ын бүлгийнхэн ажиллаж эхэлсэн.
АН-ын бүлгийнхэн өнөөдөр БСШУС, ХААХҮ, Эрчим хүчний болон Сангийн сайдуудаас өвөлжилтийн бэлтгэл болон бусад асуудлаар мэдээлэл сонсч, сонирхсон асуултдаа хариулт авчээ.
Бүлгийн хуралдаан маргааш үргэлжлэхээр болов.