“Дорнын аялгуу” хятад дуу дуулаачдын улсын уралдаан зургаа дахь удаагаа боллоо. БНХАУ-ын Олон улсын радио, “Үй цай” бүрэн дунд сургууль хамтарсан Күнзийн танхимаас жил бүр уг наадмыг зохиодог. Хятад хэл судалдаг сургуулиудын дунд болдог уг наадамд 18 сургууль оролцлоо. Улаанбаатар, Дархан, Эрдэнэтээс нийт 75 сурагч “Хүүхдийн ордон”-ы тайзан дээр авьяас ур чадвараа сорьсон юм. Наадамд оролцож буй Л.Ундрам “Үй цай” сургуулийн зургадугаар ангийн сурагч. Тэрбээр ярихдаа “Би нутгийн охины тухай дуугаар оролцож байгаа. Удаан бэлтгэсэн. Тайзан дээр гурав дахь удаагаа гарч байгаа болохоор гайгүй. Нэгэнт уралдаанд оролцож байгаа болохоор хамгийн дээд байрыг нь авахыг хүсч байна. Том болоод эмч болохыг хүсдэг” гэсэн юм.
Наадам үнэхээр ширүүн өрсөлдөөнтэй боллоо. Танхимд суусан фэнүүд ч оролцогчоо маш хүчтэй дэмжиж байсан юм.
Наадмын дүн гарахад “Үй Цай” сургууль дөрвөн насны ангилалаас гурван алт, нэг мөнгө, дөрвөн хүрэл авсан байв. “Чин хур” сургууль алт, мөнгө, “Гэгээрэл” сургууль нэг хүрэл, гурван тусгай байр, Эрдэнэт “Цайхун Гэгээ” сургууль нэг хүрэл, нэг тусгай, “Дархан Цай хун” сургууль хоёр мөнгө, гурван тусгай, 105 дугаар сургууль нэг хүрэл, нэг тусгай байр эзэлжээ.
6-8 насны нэгдүгээр байрт “Чин хур” сургуулийн сурагч Б.Буян-Ундрах, 9-11 ангилалд “Үй Цай” сургууль Энх-Үжин, 12-14 насны ангилал “Үй Цай” сургууль 7а ангийн сурагч Б.Энэрэл, 15-17 насны ангилал “Үй Цай” сургуулийн сурагч Б.Мөнхзул нар тэргүүн байрт оржээ.