Зах худалдааны төвүүдээр жимс жимсгэний үнэ хэд байна вэ? Энэ талаар тодрууллаа.
Жимсний худалдагч Л.Оюун: ОХУ-ын хил нээгдсэн нээгдээгүй жимс 7-14 хоногт орж ирж л байсан. Үнийн хувьд хилээс шалтгаалсан өөрчлөлт байхгүй. Хамгийн гол нь евро, доллар, валют аймар өсөж байна. Тэрийгээ дагаад бүх юмны үнэ тэнгэрт хадлаа. Бид чинь жимс, ногоогоо валютаар авдаг улс.Цар тахалын өмнөх жилүүдэд юмны үнэ, жимс, ногооны үнэ харьцангуй боломжийн байсан. Тэр үед худалдан авагч нар ч сайн байлаа. Жимс, ногоо маань 7 хоногтоо яг л дуусчихдаг байсан. Одоо нэг ч худалдан авагч байхгүй, бид хийх юмгүй сууж байна.Тээвэрлэлт ч гэсэн арай хэтэрхий үнэтэй байна. Өмнө нэг хайрцаг нь дээр 5-6 мянган төгрөгийн зардал нэмэгддэг байсан бол одоо 20-25 мянган төгрөг нэмэгдэж байна. Энэ арай дэндлээ.
Жимсний худалдагч н.Бат-Туул: Жимснүүдийн амт чанар, хадгалалт, үнийн дүн гэх мэт бүх зүйлс хоорондоо ялгаатай. Орос жимсний тээвэрлэлт хөргүүртэй машинаар 7-10 хоногт ирдэг учир арай амттай, чанартай. Хятад жимснүүд зооринд удаан хадгалчихсан учраас амт нь бага зэрэг сул байдаг. Гэхдээ үнийн хувьд бараг ялгаагүй. Харин Орос, Хятад ногооны үнэ тэнгэр газар шиг ялгаатай болж байна. Орос өргөст хэмх 10.000 төгрөг байдаг бол Хятад өргөст хэмх 7000 төгрөг. Помидор л гэхэд Оросынх нь 15.000 төгрөг байхад Хятадынх нь 8000 төгрөг байна.
Жимсний худалдагч н.Одноо: Хүмүүс эрүүл мэнддээ их анхаардаг болсон байна. Бельги, Орос алим, ногоон лийр, ногоон алим зэрэг дандаа европ жимс ногоог түлхүү хүнсэндээ сонгон хэрэглэдэг. Манай дээр ногоон алим сайн зарагддаг. Яахав боломжгүй хүмүүс хааяа хямдыг нь сонгож амтгүй жимс авдаг л юм. Үнэ дагаж чанар шүү дээ.
Канзи алим- 12.000 төгрөг
Ногоон алим- 10.000 төгрөг
Лийр- 8.000 төгрөг
Япон лийр- 10.000 төгрөг
Ногоон лийр- 7.500 төгрөг
Жүрж- 9.000 төгрөг
Орос алим- 7.000 төгрөг
Польш алим- 5.000 төгрөг
Лемон- 12.000 төгрөг
Гадил- 10.000-18.000 төгрөгийн үнэтэй байна.
М.САЙНЗАЯА