Дэлхийн хамгийн урт явган хүний дүүжин гүүр Португалд “Arouca 516” нэртэйгээр өнөөдөр буюу тавдугаар сарын 2-нд албан ёсоор нээлээ.
Португалын хойд бүсийн Юнескод бүртгэлтэй Ароука Геопаркийн нутагт байгуулагдсан энэ гүүр нь 516 метр урт бөгөөд хавцлаар урсах Пайва голын дээгүүр 175 метр өндөрт оршдог.
Хоёр жилийн хугацаанд барьсан уг гүүр цар тахлын дараа сэргэх аялал жуулчлалын нэг чухал газар болно гэж тус улсын эрх баригчид үзэж байна. Гүүрийг хоёр жилийн турш 2.3 сая еврогийн өртгөөр барьж дуусгажээ.
“Arouca 516” гүүр нь 2017 оноос хойш дэлхийн хамгийн урт явган хүний дүүжин гүүрт тооцогдож байсан Швейцарийн Альпийн уулан дахь “Charles Kuonen Bridge” нэртэй 494 метр урт гүүрээс 22 метрээр урт болжээ.