Жүдо бөхийн дэлхийн аварга шалгаруулах тэмцээн ОХУ-ын Челябинск хотын “Трактор Арена”-д дөрөв дэх өдрөө үргэлжилж байна. Дэлхийн 120 орны 751 жүдоч эрэгтэй, эмэгтэй тус бүр долоон жин болон багийн тэмцээнд хүч үзэх юм. Өнөөдрийн байдлаар эрэгтэйчүүдийн -60 кг, -66 кг, -73 кг, эмэгтэйчүүдийн -48 кг, -52 кг, -57 кг жингийн аваргууд тодроод байна.
Өнөөдөр эрэгтэйчүүдийн -81 кг, эмэгтэйчүүдийн -63 кг жингийн барилдаан болно. Манай улсаас эрэгтэйчүүдийн -81 кг-д О.Ууганбаатар, эмэгтэйчүүдийн -63 кг-д Б.Мөнгөнчимэг, Ц.Цэрэннадмид нар дэвжээнд гарна. Эрэгтэйчүүдийн -81 кг-д 64 бөх, эмэгтэйчүүдийн -63 кг-д 41 бөх барилдана.
Тэмцээний гурав өдөр буюу өчигдрийн дүнг танилцуулья:
Эрэгтэй: 73 кг: (68 бөх)
Алтан медаль: Рики Накая (Япон)
Мөнгөн медаль: Кук Хьюн Хон (БНАСАУ)
Хүрэл медаль: Муса Могушков (ОХУ), Виктор Сбортов (АНЭУ)
57 кг: (42 бөх)
Алтан медаль: Нае Удака (Япон)
Мөнгөн медаль: Телма Монтейро (дэлхийн аваргын дөрөв дэх мөнгөн медалиа хүртлээ. Португаль)
Хүрэл медаль: Павиа (Лондонгийн олимпийн хүрэл медальт, Франц), Санни Верхаген (Нидерланд)
V байр: Доржсүрэнгийн Сумъяа (Монгол) тус тус шалгарлаа.
Гурван өдрийн дараах байдлаар 15 орон ямар нэгэн медаль хүртээд байгаагаас Япон улс дөрвөн алт, нэг хүрэл медаль, шагналт хоёр байртай тэргүүлж байгаа бол Монгол Улс нэг алт, нэг тавдугаар байр эзэлсэн амжилтаар удаалж байна. Тэмцээнийг зохион байгуулагч ОХУ хоёр мөнгө, гурван хүрэл медаль хүртээд байна.
