Хүмүүс буруу шийдвэр, бүтэхгүй ажлыг сонсоод “Юу вэ”, “Арай ч дээ” гэж дуу алддаг. Яг ингэж дуу алдмаар юм болчихлоо. Дарга нь Монголынхоо эмнэлгийг голоод харь улсад хэдэн жилээр эмчлүүлдэг намд Эрүүл мэнд, спортынхоо яамыг өгчихдөг нь юу вэ.
МАХН-ын дарга Н.Энхбаяр нэг жил зургаан сар БНСУ-д эмчлүүлж байна. Тэр хүн Монголынхоо эмнэлэг, эмч нарыг тоолгүй харь улсад хөрөнгө оруулж, биеэ тойлуулж байгааг бид харж байна. МАХН-ынхан “Манай дарга гадаадад эмчлүүлэхгүй л бол эдгэхгүй. Монголд эмчилж чадахгүй. Гадаадад удаан хугацаанд эмчлүүлэхэд их мөнгө хэрэгтэй” гээд гүйж явсан нь саяхан. Тэд бүгд Монголын эрүүл мэндийн салбарыг дорд үздэг, хайхардаггүй нь үүний илрэл. Ийм хандлагатай хүмүүс Монголын эрүүл мэндийн салбарыг сайжруулна гэвэл ёстой харганын ноос түүж, эсгий хийхийн үлгэр болно. Үүнийг мэдсээр байж МАХН-ын Ерөнхий нарийн бичгийн дарга Г.Шийлэгдамба гэдэг эрүүл мэндийн салбарын талаар “А” үсэг ч мэдэхгүй нөхрийг Эрүүл мэнд, спортын сайдаар томилчихлоо. Олон хүн “Юу вэ. Арай ч дээ. Ой гутлаа” гэж толгой сэгсэрч хүлээж авсан. Аргагүй, МАХН гомдоллож, гоншгоноод байхаар “май” гээд өгчихсөн хэрэг. Эрүүл мэнд, спортын яам аль нэг нам, хэн нэгний гомдлыг барагдуулах гэж аргадаж өгдөг чихэр үү. Эсвэл сонирхож нэг үзээд хаячихдаг хүүхдийн хямдхан тоглоомтой зүйрлээд байна уу.
Тэр нөхөр сайд гэдэг сайхан нэр зүүж нэг жил зургаан сар өндөр цалин авахаа л бодож байгаа. Түүнээс энэ салбар, хүн амын эрүүл мэндэд ямар ч хариуцлага хүлээхгүй. Даргаасаа эхлээд эрүүл мэндийн салбараа огт тоодоггүй намынхнаас ямар ч хариуцлага нэхэх билээ. Угаасаа тэд хариуцах ч үгүй. Яагаад гэвэл тэд Монголын эмнэлэг хэрэггүй, гадаадад л сайхан эмчилдэг гэж үздэг.
Тэгвэл монголчуудын эрүүл мэнд хариуцлага шаардахааргүй хямдхан эд үү. Эд хөрөнгөө алдвал нэгийг алдсанд тооц, эрх мэдээ алдвал багыг алдсанд тооц, эрүүл мэндээ алдвал бүгдийг алдсанд тооц гэдэг хатуу үг бий. Өвчтэй л бол хэн ч юуг ч бүтээж чадахгүй. Иргэн нь бүтээж, хийж чадахгүй бол улс нь хөгжиж, оршин тогтноход хүнд болно. Гэтэл даргаасаа эхлээд эмнэлэг, эмч нараа голдог, тоодоггүй намд хүн амын эрүүл мэндээ хариуцуулсан болоод өгчихдөг нь юу вэ. Арай ч дээ.
Ц.ӨРНӨХ