Гадаад харилцааны яамнаас өнөөдөр хэвлэлийн бага хурал хийж, сүүлийн үед өрнөсөн зарим асуудлаар тайлбар хийлээ. Тухайлбал, Энэтхэгийн зээлтэй холбоотой асуудлаар яамны зүгээс “Манай хилийн чанадад байгаа дипломат төлөөлөгчийн газрын тэргүүнүүд тэр дундаа Элчид сайн, Ерөнхий консул, консулууд төвөөсөө зөвшөөрөл авч байж суугаа орныхоо хэвлэл мэдээллийн байгууллагад ярилцлага өгдөг. Энэтхэгийн нэг тэрбум ам.долларын хөнгөлөлттэй зээлийн шугамтай холбоотой мэдээллээр хэвлэлд өгсөн ярилцлагыг тодруулах үүрэг даалгаврыг Элчин сайдад нь өгчихсөн байгаа. Удахгүй хариу ирнэ” гэв. Далай ламд виз олгосон ажилтныг ажлаас нь халсан асуудлын хувьд “Энэ нь өөрөө Төрийн нууцын зохих зэрэглэлтэй холбоотой учраас ямар нэгэн хариу, тайлбар, мэдээлэл өгөх боломжгүй байна. Та бүхэн зөвөөр ойлгоно биз” гэсэн юм
Харин дуучин С.Амармандахын биед ОХУ-ын дипломат ажилтан халдсан асуудлын талаар лавлахад “Цагдаагийн байгууллага шалгаж байгаа. Энэ хүрээнд цагдаагийн байгууллагаас манай ГХЯ-нд хандаад ОХУ-ын Элчин сайдын яамны ажилтан дипломат эрх ямба эдэлдэг үү гэсэн лавлагаа авахыг хүссэн. Лавлагааг бид цагдаагийн байгууллагад хүргүүлсэн байгаа. Энэ асуудал цагдаагийн байгууллагаар шалгагдаж байгаа учраас бид нэмэлт мэдээлэл өгөх боломжгүй байна” гэсэн мэдээлэл өглөө.