“Ээлтэй ертөнц” ТББ-ын дэргэдэх “Ханни” зөөлөн тоглоомын үйлдвэрийн мастер Д.Жавзандуламтай ярилцлаа.
-Байгууллагынхаа үйл ажиллагааны талаар сонирхуулбал?
-“Ээлтэй ертөнц” ТББ-ын дэргэдэх “Ханни” зөөлөн тоглоомын үйлдвэрийг хөгжлийн бэрхшээлтэй хүүхэдтэй гэр бүлүүдэд дэм болох, хүүхдүүд нь аюулгүй орчинд суралцах боломжийг бүрдүүлэхийн тулд 2011 онд үйлдвэр болон үйл ажиллагаагаа эхэлж байсан. Үйлдвэрт маань хөгжлийн бэрхшээлтэй хүүхдүүдийн эцэг, эхчүүд нэгдэн 2011 онд үйлдвэр болж одоог хүртэл ажиллаж байна. “MCS” компани бидний ажиллаж байгаа энэ оффисыг таван жилийн турш үнэгүй хэрэглүүлж байгаа. Бид байгууллага болон хувь хүмүүсийн захиалга авч зөөлөн тоглоомоо хийдэг. Одоогоор “Ханни” зөөлөн тоглоомын үйлдвэрт 10 хүн, “Энэрэл” хүүхэд хөгжүүлэх төвд 10 хүн тус тус ажиллаж байна.
-Саяхан “Дуслын чихмэл” өлгүүрийг гаргасан шүү дээ. Хэрхэн санаачилж бүтээх болсон бэ?
-Сарын өмнө байгууллагын тэргүүн маань нийгэм, хүүхдэд ээлтэй зүйл шинээр хийе хэмээсэн. Ингэснээр дуслын системийн гадуур зөөлөн чихмэл тоглоом зүүлгэж хийвэл хүүхдүүд айхгүй юм байна гэж бодсон. Энэ санаа үнэхээр манайхны зүрх сэтгэлээс гарсан. Түүнээс хойш ажил хэрэг болгож ажиллаж эхлээгүй байсан. Хэд хоногийн өмнө Ч.Ганжавхлан бидэнтэй холбогдож “Танай байгууллага дуслын тоглоом хийх гэж буй талаар ярьж байсан. Бид Гэмтэл согог судлалын үндэсний төвийн хүүхдийн мэс заслын тасгийг тохижуулж байгаа юм. Үүндээ зориулан 10 ширхэг дуслын уут чихмэлийг бэлэглэмээр байна” хэмээсэн. Түүнээс хойш хувь хүн, албан байгууллагууд их холбогдож байна. Бид дуслын чихмэл уутыг “Ёо ёог гого болгоё” уриагаар хийж эхэлсэн. Одоогоор 100 гаруй чихмэлийн захиалгатай явж байна. Орон нутгаас ч өрхийн эмнэлгүүд холбогдож захиалга өгч байгаа.
-Өөр ямар төрлийн бүтээгдэхүүн гаргадаг вэ?
-Ерөнхий боловсролын сургуулийн сурагчдын хөдөлмөрийн хичээлд оёж сургахад зориулан таван төрлийн оёдолтой оёход бэлэн бэлдэцийг гаргасан. Гар оёдлын бэлдцэд чихмэл дотор хийх чихэлтийн материал, өнгийн утас, оёдол хийх дүрст даавуу, дүрст цаасан үлгэр, хэрхэн оёх зааварчилгаа багтаж байна.
Хүүхдүүд зөөлөн тоглоомоо өөрсдөө гараараа урлаж, чөлөөт цагаа зөв боловсон өнгөрөөх давуу талтай бүтээгдэхүүн юм. Одоогоор 20 мянган ширхэг бэлдэц бэлэн байна. Үүнийг маань Ерөнхий боловсролын сургуулиуд дэмжээсэй гэж хүсч байна.
-Танай байгууллагын цаашдын зорилго юу байна вэ?
-Цаашид бид бүтээгдэхүүнүүдээ илүү сайжруулж, олон нэр төрлийн бүтээгдэхүүн гаргах сонирхолтой байна. Хүүхдүүдийн технологийн хичээлд зориулсан бүтээгдэхүүнээ хүүхдэд илүү ойлгомжтой байлгаж өнгө үзэмжийг нь сайжруулах дээр ажиллаж байна. Олон төрлийн зөөлөн тоглоомыг гаргахаар шинэ загвар дээр ажиллаж байгаа.
-Эцэг эхчүүд хүүхдийнхээ хуучирсан тоглоомыг авч очоод шинээр оёулдаг гэсэн үү?
-Тийм ээ. Манайхаас авсан тоглоом хуучирч, муудсан үед дахин шинээр хийлгүүлдэг. Эцэг эхчүүд “Танайхаас авсан туулай бүр муудчихлаа, шинээр оёулах гэсэн юм, хүүхэд нь хайртай тоглоомоо гээчихлээ гээд уйлаад шөнө унтдаггүй” гээд аав нь ирж оёулж авч байсан. Хүүхдүүд ч гадаа тоглож байгаад тоглоосоо алга болгох зэрэг асуудал үүсдэг юм байна лээ. Ер нь манайхаас тоглоом авдаг хүмүүс зөөлөн тоглоомыг муудахаар нь дахиж ирэн шинээр оёулж авдаг.
-Их сургуулийн оюутнууд танай байгууллагад сайн дурын ажил хийдэг гэсэн үү?
-Манайд сайн дурын ажил хийхээр дээд сургуулийн сурагчид их ирдэг. Гадаад орон руу суралцах сонирхолтой оюутнууд тамгатай сертификат авдаг. Сайн дурын ажил хийж нийгмийн оролцоотой байх нь гадаад руу сурахаар явах гэж буй сурагчдад их нөлөөлдөг. Оюутнууд фэйсбүүк цахим орчноос танайхыг хараад хайж ирлээ гэдэг.
-Коронавирусийн үед үйл ажиллагаа нь ямар байсан бэ?
-Хоёр жилийн хугацаанд манайд маш хүнд байсан. Хил хаалттай байж бүтээгдэхүүнүүд орж ирээгүй учраас хоёр жил үйл ажиллагаа зогссон. Хил нээгдэн зөвшөөрөл гарсан ч бүтээгдэхүүнүүдээ хийх материал үгүйн учраас саяхнаас л материалууд орж ирэхэд үнэ нь нэг дахин нэмэгдэж орж ирсэн. Манай зөөлөн тоглоомын дүүргэлтийн материал нэг шуудай 15 кг материалыг 150 мянган төгрөгөөр авч байсан бол одоо 300 мянган төгрөгөөр авч байна. Энэ хүнд үеийг туулах гээд бид бүхий л хүчээрээ чармайж байна. Одоо л ажил жигдрээд явж байна.