Олон улсын дуурийн залуу дуучдын уралдаануудын гранпри, тэргүүн, дэд байрын шагналт Чулуунбаатарын Бадралын ярилцлагыг хүргэе. Тэрбээр Москвагийн Гнесиний нэрэмжит хөгжмийн академийн төгсөх курсад сурч буй юм.
-ОХУ-ын нэрт дуучин, Оросын ардын жүжигчин Елена Образцовагийн нэрэмжит олон улсын дуурийн дуучдын уралдаанд хоёрдугаар байр эзэлсэнд баяр хүргэе. Уралдааны явцаас сонирхуулаач?
-Маш сайхан боллоо. Энэ уралдаанд Монголын дуучид анх удаа оролцож амжилт гаргалаа. Олон орны дуучид оролцсон чансаатай уралдаан болсон. Шүүгчдийн бүрэлдэхүүнд баруун Европын болон дэлхийн нэртэй хүмүүс суулаа.
-Та өмнөх олон уулсын уралдаануудад баритон хоолойнд зориулсан сор болсон ари романсуудаас гайхалтай сайхан дуулсан. Энэ удаа ямар бүтээлүүдээс дуулав?
-Ж.Верди, Шуберт, С.Рахманинов, П.И.Чайковский нарын бүтээлүүдээс дууллаа.
Вердийн “Риголетто” дуурийн Риголеттогийн ари, мөн “Трубадур” дуурийн Граф ди Луна, Чайковскийн “Мазеппа” дуурийн Мазеппагийн ари гэхчлэн.Мөн Орос болон баруун Европын романсуудаас дууллаа.
-Сүүлчийн шатанд ямар ари дуулав?
-Сүүлийн шатанд оролцогч бүр таван ари бүртгүүлснээс шүүгчид хоёр ари сонгож дуулуулах байсан юм. Шүүгчид хоёр ари сонгож дуулуулах байсан юм.
Тэгээд шүүгчдийн сонголтоор Риголетто, Мазеппа хоёрыг оркестртой дуулсан даа.
-Та өнгөрсөн 2014 онд Оросын бас нэг уралдааны тайзан дээр Бородины “Игорь ван”-гийнх нь ариг, мөн Рахманиновын Алеког үнэхээр сайхан дуулсан. Тэр талаараа та ямар бодол сэтгэгдэлтэй яваа вэ. Дандаа томоохон дууриудаас дуулсан шүү дээ?
-Тэр бол Оросын “”Культура” телевизээс зохиодог “Большой опера” гэж том тэмцээн юм. Арван үе шаттай, хоёр сар гаруй үргэлжилсэн. Тэр уралдаанд олон дууиас дуулсны нэг нь Рахманиновын “Алеко” байсан. Бас өндөр үнэлгээ авсан бүтээлүүдийн нэг байлаа.
-Тэр тайзан дээр Б.Шарав гуайн “Чингис хаан” дуурийн Чингэс хааны ариг дуулсан тань сэтгэл хөдлөм байлаа. Та яг Чингис хааны ари дээр бусад дууриас бүр огт өөр болоод ирэх шиг. Сэтгэл хөдлөл тань их гүнзгийрч харагдсан?
–Шарав гуайн дуурийн Чингис хааны ари дуулсан тухайд, хөтөлбөрийнх нь дагуу орчин үеийн хөгжмийн зохиолчдын бүтээлээс дуулах ёстой байсан юм л даа. Тэгээд Шарав гуайн “Чингис хаан” дуурийн Чингис хааны ариг сонгож дуулсан. Ер нь гадныхан манайд сонгодог урлаг ямар түвшинд хөгжиж байгааг сайн мэддэггүй. Тиймээс монгол хүн өөрөө зохиогоод монгол дуучид дуулаад их хааныхаа тухай дуурь тоглодог гэдгийг харуулах бодол надад байсан.
Хаана ч явсан бидний цаана улс орны нэр гарч байдаг учраас тэр утгаараа үзэгч олон болон шүүгчид маш сайн хүлээж авсан шүү. Мэдээж монгол хүн учраас монгол дуурийнхаа ариг, тэр дундаа Чингис хааныхаа ариг дуулаад зогсч байхад сайхан байлгүй яахав.
Тэгээд тэр уралдаанд маш сайн оролцож шагналт байрт орсон доо. Үүгээр болон бусад уралдаануудаас намайг Оросын ард түмэн маш сайн таньдаг болж бас их хүндэлдэг болсон доо.
-Өнгөрсөн долоо хоногт өндөрлөсөн уралдаанд та хоёрт жагссанаар Марийнскийн театрт дуулахаар боллоо. Энэ талаар?
-Тийм ээ. Энэ уралдаанд бас нэг тусгай шагнал нь Марийнскийн театрт дуулах эрх байсныг нь надад өгсөн. Мөн өнгөрсөн онд Магнитагорск хотын Дуурь балетын театр урьж гэрээ хийснээр бас тэнд ажиллаж байна. Ямар ч байсан урилгаар дуулдаг болж эхэллээ. Хэрэв хүсвэл гэрээгээр дуулаад байж болно.
-Сургуулиа та хэзээ төгсөх билээ?
-Энэ жил төгсөнө дөө.
-Төгсөөд эх орондоо ирэх үү, тэнд үлдэх гэж байгаа юу?
-Мэдээж нутаг буцна. Ер нь театруудтай гэрээтэй ирэн очин дуулж байх бодолтой байна. Би чинь Монголдоо ЦДБЭЧ-ын гоцлол дуучин ажилтай. Мэдээж чуулгадаа уран бүтээлээ хийнэ дээ.
-Таны төрсөн нутаг Сэлэнгэ аймаг гэсэн байх аа?
-Тийм ээ, Сэлэнгэ аймгийн Зүүнбүрэн суманд төрсөн. Аав ээж минь одоо нутагтаа амьдарч байна. Сэлэнгэ мөрнийхөө усанд шумбаж, хурдан морь унаж өссөн дөө. Жирийн л хөдөөний хүүхэд. Сумандаа 10 жилийн сургуулиа төгссөн. Аав ээж минь одоо нутагтаа амьдарч байна. Аав маань их сайхан дуулдаг хүн бий. Аавын маань бас нэг хүсэл мөрөөдөл нь дуучин болох байсан болов уу.
-Та ноднин Игорь вангийн ариг дуулж байхдаа юу мэдэрч байв. Энэ ямар гоё дуурь билээ, та ч ямар гоё дуулав аа?
-Тийм ээ, Игорь бол миний хамгийн дуртай дуурь. Мэдээж, дуулж байгаа дүр болгондоо нэвтэрч, утгыг нь гаргаж дуулахыг хичээдэг дээ.
-Магнитагорск хотын Дуурь бүжгийн театрт гэрээтэй ажиллаж байгаа гэлээ. Дуурьт гарч эхэлсэн үү?
-Эхэлсэн. Өнгөрсөн дөрөвдүгээр сард И.Кальманы “Принцесса цирка” дуурьт дуулсан. Мистер икс гэж гол дүрд дуулсан. Энэ намраас дүрүүд ар араасаа байна аа.
-Энэ намар ямар дуурьт дуулах гэж байгаа вэ?
-Онегинд дуулна.