Category: соёл-урлаг

Энэ сарын 17-ноос 23-ны өдрүүдэд “Найрсаг Улаанбаатар” хөтөлбөрийн хүрээнд “Гэгээн муза” наадам зохион байгуулагдаж байгаа билээ. Наадмын ерөнхий зохион байгуулагчаар “Гэгээн муза” академи ажиллаж буй бол хамтран зохион байгуулагчаар Нийслэлийн Засаг Даргын Тамгын Газар, Боловсрол Соёл Шинжлэх Ухааны Яам, Улсын Драмын Эрдмийн Театр, дэмжигч байгууллагаар Засгийн газрын хэрэгжүүлэгч агентлаг, Хүүхдийн Төлөө Үндэсний Газар, Улсын Хүүхэлдэйн Театр, Монголын Урлагийн Залуучуудын Холбоо зэрэг байгууллагууд ажиллаж байна. Улаан хивсний ёслолын ажиллагаа энэ сарын 23-ны 15:00 цагт, Академийн шагнал гардуулах ажиллагаа 16:00 цагт тус тус болох юм. Энэ жилийн “Гэгээн Муза”-д нэр дэвшиж буй бүтээл, уран бүтээлчдийг танилцуулж байна.

ХӨГЖИМТ ЖҮЖГИЙН ТӨРӨЛД:

• “Чөлөөт хос” /УДЭТеатр/

• “Галдан бошигт хаан” /Ховд аймгийн ХДТеатр/

• “Хар торгон хамжаар” /БНХАУ-ын ӨМӨЗОроны “Хаан титэм” соёлын компани/

• “Өнгөрсөн цагийн салхи” /ОХ-ны Буриад улс Хоц. Намсраевын нэрэмжит ДУАТеатр /

Шилдэг жүжгийн зохиолч

• Н.Сүхдорж “Галдан бошигт хаан” жүжгээр

• Н.Ган “Хар торгон хамжаар” жүжгээр

Шилдэг найруулагч

• Н.Найдандорж “Чөлөөт хос” жүжгээр

• Б.Мөнхдорж “Галдан бошигт хаан” жүжгээр

• Г.Дорж “Хар торгон хамжаар” жүжгээр

• Саян Жамбалов “Өнгөрсөн цагийн салхи” жүжгээр

Шилдэг тайзны зураач

• н.Мягмарсүрэн “Чөлөөт хос” жүжгээр

• Ц.Энхтуяа “Галдан бошигт хаан” жүжгээр

• Д.Хуяг “Хар торгон хамжаар” жүжгээр

Шилдэг хөгжмийн зохиолч

• н.Энхбаяр “Чөлөөт хос” жүжгээр

• Б.Мөнхболд “Галдан бошигт хаан” жүжгээр

• Д.Батмөнх “Хар торгон хамжаар” жүжгээр

Шилдэг эрэгтэй гол дүр

• Э.Тодгэрэл “Чөлөөт хос” жүжгийн Мамбретогийн дүрээр

• Б.Цэнд-Аюуш “Галдан бошигт хаан” жүжгийн Галдан хааны дүрээр

• У.Хүлэгдэй “Хар торгон хамжаар” жүжгээр

• Үржин Гармаев “Өнгөрсөн цагийн салхи” жүжгээр

• Чингис “Өнгөрсөн цагийн салхи” жүжгээр

Шилдэг эмэгтэй гол дүр

• Ц.Баясгалан “Чөлөөт хос” жүжгийн Антониягийн дүрээр

• С.Лхамхүү “Галдан бошигт хаан” жүжгийн Ану хатны дүрээр

• Б.Сарантунгалаг “Хар торгон хамжаар” жүжгээр

• Дарима “Өнгөрсөн цагийн салхи” жүжгээр

• Ольга “Өнгөрсөн цагийн салхи” жүжгээр

• Должин “Өнгөрсөн цагийн салхи” жүжгээр

НЭГ ХҮНИЙ ЖҮЖГИЙН ТӨРӨЛД:

• “Хүний дуу хоолой” /Монгол/

• “Ялаа” /Монгол/

• “Хайрт минь би чамайг хүлээж байна” /Монгол/

• “Ашгүй бүх юм дууслаа” /Монгол/

• “Танихгүй эмэгтэй захидал” /Монгол/

• “Улаан дэнлүүт асар” /Монгол/

• “Амок” /Косова/

• “Гараа надад өгөөч” /Орос/

• “Ганцаараа” /Эстон/

• “Анир чимээгүй хэрэв мэдсэн бол” /Швейцарь/

Шилдэг найруулагч

• Н.Наранбаатар “Танихүй эмэгтэй захидал” жүжгээр

• М.Боролдой “Хүний дуу хоолой”, “Ялаа” жүжгүүдээр

• Л.Эрдэнэ-очир “Ялаа” жүжгээр

• Б.Бат-Өлзий “Ашгүй бүх юм дууслаа” жүжгээр

• Н.Төмөрбат “Хайрт минь би чамайг хүлээж байна” жүжгээр

• Nura “Амок” жүжгээр

• Meosmart “Ганцаараа” жүжгээр

Шилдэг тайзны зураач

• Н.Батбилэг “Танихгүй эмэгтэй захидал” жүжгээр

• М.Боролдой “Хүний дуу хоолой”, “Ялаа” жүжгүүдээр

• З.Ёндон “Ашгүй бүх юм дууслаа” жүжгээр

• Л.Цэрэндулам “Хайрт минь би чамайг хүлээж байна” жүжгээр

Шилдэг эмэгтэй жүжигчин

• н.Оюунзул “Хүний дуу хоолой” жүжгээр

• Б.Одончимэг “Танихгүй эмэгтэй захидал” жүжгээр

• Б.Энхжаргал “Хайрт минь би чамайг хүлээж байна” жүжгээр

• Б.Туяа “Улаан дэнлүүт асар” жүжгээр

• Castrillo Mariacristina “Анир чимээгүй хэрэв мэдсэн бол” жүжгээр

Шилдэг эрэгтэй жүжигчин

• Л.Баасанжаргал “Ялаа” жүжгээр

• Я.Билгүүнсар “Ашгүй бүх юм дууслаа” жүжгээр

• Mentor Zymberaj “Амок” жүжгээр

• Hendrik Toompere “Ганцаараа” жүжгээр

• Nicolai Gorokhov “Гараа надад өгөөч”

ХҮҮХДИЙН ЖҮЖГИЙН ТӨРӨЛД:

• “Арван хоёр сар” /УХТеатр/

• “Сарыг нуусан саваагүй бэлтрэг” /Орхон аймгийн ХЗТеатр/

• “Алладины шидэт дэндлүү” /”Шилдэг өнгө” продакшн/

• “… Дараа” /Солонгос улсын “Мөрөөдлийн байшин” театр/

Шилдэг жүжгийн найруулагч

• М.Ариунтуяа “Арван хоёр сар” жүжгээр

• Ё.Баярмагнай “Сарыг нуусан саваагүй бэлтрэг” жүжгээр

• Ц.Хүсэлбаатар “Алладины шидэт дэнлүү” жүжгээр

• Ким Со Неон “…. Дараа” жүжгээр

Шилдэг тайзны зураач

• В.Энх-Амгалан “Арван хоёр сар” жүжгээр

• Б.Сайханбаяр “Сарыг нуусан саваагүй бэлтрэг” жүжгээр

Шилдэг эрэгтэй гол дүр

• н.Эрдэнэпүрэв “Сарыг нуусан саваагүй бэлтрэг” жүжгийн Бэлтрэгийн дүрээр

• н.Мөнхбаатар “Алладины шидэт дэнлүү” жүжгийн Алладины дүрээр

• Кан Жу Сеон “…Дараа” жүжгээр

Шилдэг эмэгтэй гол дүр

• С.Оюунболд “Арван хоёр сар” жүжгийн Дагавар охин дүрээр

• Т.Мөнхсайхан “Сарыг нуусан саваагүй бэлтрэг” жүжгийн Тооройн дүрээр

• О.Золзаяа “Сарыг нуусан саваагүй бэлтрэг” жүжгийн Бүжингийн дүрээр

• Х.Баярмаа “Алладины шидэт дэнлүү” жүжгийн Жасмины дүрээр

Шилдэг эрэгтэй туслах дүр

• Г.Золбоот “Алладины шидэт дэнлүү” жүжгийн Бирдийн дүрээр

• Жан Се Хюн “… Дараа” жүжгээр

Шилдэг эмэгтэй туслах дүр

• Э.Ганчимэг “Арван хоёр сар” жүжгийн Охины дүрээр

• Х.Батмөнх “Арван хоёр сар” жүжгийн Хойд эхийн дүрээр

• Ким Со Неон “… Дараа” жүжгээр тус тус өрсөлдөж байна

Драмын урлагийн шилдгүүдийг тодруулдаг “Гэгээн Муза-2015” наадам энэ сарын 17-23-нд болно. Өнгөрсөн оны 12 дугаар сард Ереван хотноо болсон Олон улсын театрын институтийн 34 дүгээр их хуралд тус байгууллагын Монгол дахь төвийн Ерөнхийлөгч, Ардын жүжигчин С.Сарантуяа, боловсролын хорооных нь тэргүүн, Ардын жүжигчин, Төрийн шагналт Н.Сувд нар оролцож, “Гэгээн муза” наадмыг Олон улсын наадамд албан ёсоор бүртгүүлсэн байдаг. Наадамд Швейцарь, БНХАУ, Уганда, Эстони, Косово, БНСУ-аас уран бүтээлчид оролцохоор мэдэгджээ.

Бүтээлүүдийг хүүхдийн, ганц хүний, драмын, дуулалт жүжиг гэсэн ангиллаар шүүх юм. Наадмын шүүгчээр “Би Эдип Пиаф байна” жүжгийн зохиолч Нина Мазур оролцохоор болжээ. Мөн Герман, Орос, Косово улсаас шүүгчид ажиллах юм. Одоогийн байдлаар тус наадамд хот, хөдөө орон нутаг, олон улсаас 50 орчим бүтээл ирүүлсэн байна.

Нобелийн шагналт зохиолч Дарио Фогийн зохиол, найруулагч УГЗ Ч.Найдандоржийн найруулга “Чөлөөт хос” хилэнт, инээдмийн жүжиг маргааш 18:00 цагт УДЭТ-ын тайзнаа ганцхан удаа тоглогдох юм байна. Энэхүү бүтээл нь УДЭТ-ын уран бүтээлчдийн хэрэгжүүлсэн бэсрэг жүжгүүдийн зургаа дахь уран бүтээл, насанд хүрэгчдэд зориулсан хайрын сэдэвт хилэнт, инээдмийн жүжиг юм.

Түүнчлэн “Гэгээн муза-12” олон улсын театрын наадамд хөгжимт жүжгийн төрөлд нэр дэвшиж байгаа аж. Жүжгийн гол дүрийг бүтээсэн соёлын тэргүүний ажилтан, жүжигчин Ц.Баясгалан оны шилдэг уран бүтээлд олгодог шагналыг хүртсэн билээ.

“Asia’s got talent” шоу нэвтрүүлгийн шилдэг есөн оролцогч хаалтын тоглолт дээр хамтарсан уран бүтээлээ толилуулсан байна. Энэхүү хамтарсан уран бүтээлд манай “Хөсөгтөн” хамтлагийнхан оролцов. “Хөсөгтөн” хамтлагийн хувьд энэ шоунд дэд байрт шалгарч, Монголын урлагийг Ази тивдээ сурталчилж чадсан билээ. Дашрамд дуулгахад “Хөсөгтөн” хамтлагийнхан маргааш үдэд эх орондоо ирэх юм байна.

Монгол Улсаа төлөөлөн дэлхийн алдартай шоуны нэг “Asia’s Got Talent” шоу нэвтрүүлэгт “Хөсөгтөн” хамтлаг эх орноо төлөөлөн оролцсон. Тэдний амжилт ч гэсэн чамлахааргүй байгаа тухай мэдээлэл гарч байсан билээ. “Хөсөгтөн” хамтлаг шилдэг есөн оролцогчийн нэгээр шалгарч, сүүлийн шатанд үлдээд байсан бол шийдвэрлэх мөч өчигдөр болсон юм. “Хөсөгтөн” хамтлаг морин хуурч, хөөмийч В.Батзориг, лимбэчин, цохиур хөгжимчин, хөөмийчин Г.Адъяадорж, товшлуурч, хөөмийч, дунд хуурч Х.Уламбаяр, их хуурч, хөөмийч Д.Ариунболд, ятгачин, дуучин Ч.Амарбаясгалан, морин хуурч, хөөмийч О.Чулуунбаатар гэсэн бүрэлдэхүүнтэй оролцсон байна. Тэмцээний ялагч 100 мянган ам.долларын эзэн болохоос гадна Сингапурын “The Marina Bay Sands” зочид буудалд тоглолт хийх эрх авах юм.

Тэгвэл “Хөсөгтөн” хамтлаг маань өчигдөр орой уг шоуны хоёрдугаар байрт шалгарлаа.

Э.ЭНХ

Монголын үзэгчдэд Чингис хааны тухай өгүүлсэн Монгол киногоороо танил болсон Оросын найруулагч Сергей Бодровын Холливуудад бү­тээ­сэн Seventh Son буюу Долоо дахь хүү кино үзэгчдийн хүр­тээл болж байна.

Киног The Spook’s Apprentice буюу Чөтгөрийн шавь зохиолоос сэдэвлэн хийсэн ч нэрийг нь өөрчилж Долоо дахь хүү болгосон нь учиртай аж. Учир нь өрнө, дорны домог болоод шашин шүтлэгт долоогийн тоо олон зүйлийг бэлгэддэгтэй холбоотой аж. Тиймээс кинонд гарч буй долоо дахь хүү Грэгори өөрийн шавиараа мөн л айлын долоо дахь хүү Томыг сонгож шулмын эсрэг тэмцэж буй талаар өгүүлдэг. Грэгори, Том хоёрын хэн хэн нь шулам ангуучлахаар төрсөн айлын долоо дахь хөвгүүд. Тэр хоёр шулмын ангууч төдийгүй нэг нь нөгөөдөө хэрхэн шуламтай тэмцэж, нутаг орон хүн ардаа аврахыг заан сургаж байгаа хүмүүс.

Грэгорийн дүрд Жэф Бри­жис, Томын дүрд Бэн Барнс тоглосон бол тэдний барихаар орол­дож буй шулам Малкины дурд энэ жилийн Оскарын шагналт жүжигчин Жулиан Мур, Алисын дурд Алисиа Викандэр нар тогложээ. Кино зохиолыг номоос сэдэвлэн бичсэн ч гэлээ үйл явдал дээр нэлээд өөрчлөлт орж зөвхөн зохиолын гол хэсэг л үлдэж гэдгийг олонх шүүмжлэгч он­цолжээ.

Зураг авалт 2012 оны 3 сард эхэлж 2013 онд дэлгэ­цэнд гаргахаар төлөвлөж байсан ч нээлтийн хугацаа хэд хэдэн удаа хойшлож, 2014 оны 12 сард Францад энэ оны 2 сард Хойд Америкт нээлтээ хийсэн билээ. 95 сая ам.долларын өртгөөр бүтэж 110 сая ам.долларын орлого олсон нь тус киног муугүй амжилттай байсныг илтгэнэ.

Жэф Брижис

Америкийн жүжигчин, дуу­чин, продюсер Жэф Бри­жис сайхан эр, үлгэр жишээ нөхөр гэдгээрээ алдартай. Жүжигчдийн гэр бүлээс га­рал­тай түүний ах мөн л жүжиг­чин. Аавыгаа даган аялан тоглолтоор явж жүжигчнээр суралцаж байсан Жэф 18 нас хүрч цэргийн алба хаан АНУ-ын Эр­гийн хамгаалалтын албанд хэдэн жил хүчин зүтгэжээ. Энд ажил­лаж байхдаа олж авсан туршлага нь хожим түүнийг эрэмгий зоригтой, шийдэмгий эр хүнийг харуулсан олон дүр бүтээхэд нь тус болсон гэж өөрөө ярьсан байдаг.

Жэф Оскарын шагналд хэд хэдэн удаа нэр дэвшсэнээс Галзуу зүрх киноныхоо дүрээр шагнал гардаж байсан тэрээр Жинхэнэ хатуужил, Трон, Орол­цогч, Төмөр хүн зэрэг олон арван кинонд тоглосон үзэгчдийн хайртай жүжигчдийн нэг билээ. Жүжиглэхийн хажуугаар дуу хөгжимд со­нир­холтой тэр гурван ч цомог гаргасан дуучин. Мөн Жэф Брижис хүмүүнлэгийн үйлсэд идэвхитэй оролцогч бөгөөд өлсгөлөнд нэрвэгдсэн хүүхдүүдэд туслах End Hunger Network байгууллагын үүсгэн байгуулагчдын нэг юм.

Бэн Барнс

Английн жүжигчин Бэн Барнс Нарниагийн домог ки­ноны хунтайж, Дориан Грэй киноны Дориан Грэй болон Үгс, Хөлтэй хурим кинонуудын тус­лах дүрд тоглосноороо үзэгчдийн танил болсон. Сэт­гэл зүйч эцэг эхтэй тэрээр багаасаа урлагийн сургуульд суралцаж, жүжиглэх урлагийн зэрэгцээ Английн уран зохио­лоор мэргэшжээ. Өсвөр на­сан­даа Залуусын хөгжимт жүжгийн театрт Холливуудын одод болох Жүүд Лоов, Жэми Бэлл нартай хамт ажиллаж байв. Тэр 15 насандаа анхны­хаа том дүрийг авсан нь бөм­бөрчний дүр байв. Үүний да­раа­гаар Hyrise хэмээх хөвгүүдийн хамтлагт дуулж байхдаа 2004 оны Евровишн тэмцээнд улсаа төлөөлөн оролцох шалгаруулалтанд орж байжээ.

Түүний тоглосон анхны бүрэн хэмжээний кино нь Оддын тоосонцор байлаа. Дараагаар нь Нарниагийн домог үлгэрийн киноны Кас­пийн хунтайжийн дүрийг бү­тээхээр болж хоёр ч ан­гид тоглосон нь түүнийг Холливуудад таниулж өгөв. Энэ дүрийг төвөггүйхэн ав­сан нь тэр хүүхэд байхдаа зохиолыг нь унших дуртай байсантай холбоотой. 2008 онд тэр Жэссика Билтэй хамт­ран Хялбархан кинонд тоглосон нь Торонтогоос эх­лээд дэлхийн олон орны кино наадамд оролцсон амжилтыг гаргажээ. Бэний тоглосон удаах томоохон дүр нь Оскар Вайлдын Дориан Грэйн хө­рөг зохиолоос сэдэвлэсэн киноны гол дүр байв. Түүний тоглосон удаах кинонууд бо­лох Үгс, Хөлтэй хурим ашиг орлогоороо тэргүүлж байсан ч шүүмжлэгчдийн зүгээс тааруу үнэлгээ авсан юм. Бэн хамгийн сүүлд Долоо дахь хүү киноны Том Вордын дүрийг бүтээгээд байна.

Seventh Son Universal Pictures

Хүмүүсийг шулмын хор хөнөөлөөс хамгаалахын тулд хамгийн хүчтэй, аюултай шулам Mother Malkin-ыг хорьжээ. Үүнийг Master Gregory хийсэн бөгөөд олон жилийн хойно зуун жилд ганц тохиох үйл явдлын нөлөөгөөр Malkin-ы хүч чадал хэмжээлшгүй их болж тэр өөрийгөө суллажээ. Шулмыг дарахын тулд Gregory өөр нэгний тусламжийг авах хэрэгтэй болсон нь долоо дахь хүү Tom Ward байлаа.

I am Ali Universal Pictures

Мэргэжлийн боксын хүнд жингийн дэлхийн аварга, 1960 оны Ромын олимпийн алтан медальт, боксын спортын домогт тамирчин Muhammad Ali. Спорт сонирхогчдын дунд алдарт тамирчин гэдгээрээ танигдсан тэрээр жирийн амьдрал дээр эцэг, эр нөхөр, найз нөхрийн хувьд ямар хүн бэ? Түүний хувийн архиваас гадна гэр бүл, найз нөхөд, боксын домогт тамирчидтай хийсэн сонирхолтой ярилцлагаар энэхүү баримтат киног баяжуулжээ.

All About Eve 20th Century Fox

Бродвэйн залуу од Eve шинэ дүрээрээ нэр хүндтэй шагнал гардан авахдаа өөрийг нь өдий зэрэгт хүргэсэн хүмүүст талархлын үгсээ харамгүй хэлэх аж. Үзэсгэлэнтэй, залуухан, авъяаслаг энэ бүсгүй чухам яаж энэ зэрэгт хүрсэн түүхийг хэн ч мэдэхгүй. Түүний нэр алдарт хүрсэн замнал бохир байсан ч тэр өөрийгөө зөв зүйл хийсэн гэж бодно. Харин хожмын нэг өдөр өөрийнх нь гаргасан аашийг өөр нэгэн гаргана гэдгийг бодсонгүй.

My Secret Partner Roxy Pictures

Цагтаа нэртэй зохиолч байсан Joon-Suk онгодоо оруулж зохиол бүтээлээ туурвихын тулд, харин хоол хүнсний шилдэг судлаач Hee-Sook шинэ хоолны санаа олохын тулд юу ч хийхэд бэлэн байв. Эргэн тойрныхон нь тэдэнд дотно харилцаа үүсгэхийг зөвлөсөн тул тэд насаар залуу өөрсдийн шавь нартайгаа дотносч эхлэн энэ нь ч үр дүнгээ өгч ажилдаа амжилт гаргацгаана. Хосуудын харилцаа улам лавшрах үед…

“Asias Got Talent”шоуны сүүлийн шатны шалгаруулалт энэ сарын 10-нд болсон.

Тус шоунд улсаа төлөөлөн оролцсон ардын урлагийн “Хөсөгтөн” хамтлаг шилдэг 9 оролцогчоор шалгараад буй. Тэмцээний сүүлийн шатны санал асуулга энэ сарын 11-нийг хүртэл явагдсан юм.

Харин өнөөдөр шилдэг 9 хамтлагийн хамтарсан Гала тоглолт болох юм. Энэ үеэр ялагчийг зарлах аж.

Тэмцээний ялагч 100.000 ам.долларын эзэн болохоос гадна Сингапурын “The Marina Bay Sands” зочид буудалд тоглолтоо хийх эрхтэй болно.

Жүжигчин Г.Ундармаа “Шинэ үе” продакшнаас гарч, хүмүүнлэгийн үйлст хувь нэмрээ оруулж эхэлсэн. Тэрээр “Анх нэгдүгээр эмнэлэгт аавыгаа сахиж байхдаа сахиурын өрөө ямар чухал болохыг ойлгосон. Учир нь эмнэлэгүүд хэвтэрт байгаа хүмүүсээ сайтар анхаардаг боловч тэднээс дутуугүй зовж шаналсан, ядарсан, хүнд байдалд орсон сахиурууд хаягддаг. Арга ч үгүй биз. Өвчтөнийг нь харна, хажуугаар нь сахиурыг нь харна гэж юу байхав. Ингээд би энэ аяныг эхлүүлсэн дээ, түүнээс би их мөнгөтэй биш. Энэ бүх зүйл дан хандивын мөнгөөр боссон. Улсын клиникийн нэгдүгээр эмнэлэгээс эхэлсэн энэ аян маань Хавдар судлалын үндэсний төвд үргэлжилнэ” гэж өнөөдөр сэтгүүлчидтэй уулзах үеэрээ хэллээ.

Мөн тэрээр хандивын аянаас гадна өөрийн уран бүтээлээ ч мартсангүй, “Ю-Фильм” студийн бүтээл Single ladies инээдмийн киноныхоо хоёрдугаар ангийг хийж эхлэхээр төлөвлөсөн бөгөөд энэ удаагийн ангид мөн л жүжигчин Туяа, Дөлгөөн, Ундармаа нар тоглож өмнөх ангид найз залуутай, нөхөртэй болсон бүсгүйчүүд дахин ганц бие болж байгаа тухай өгүүлнэ. Тэрээр энэ киноныхоо талаар “Ганц бие бүсгүйчүүдэд жаргал зовлон байдгийн адил гэр бүлтэй эмэгтэйчүүдэд ч өөрийн гэсэн жаргал, бас бэрхшээл бий. Хүн өөрийнхөө аз жаргалыг мэдэрдэггүй, бусдын аз жаргал тэмүүлэх нь бий. Тиймээс таны аз жаргал дэргэд чинь байна шүү гэдгийг харуулахыг зорьсон” гэжээ.

Ахмад зохиолч Долгорын Нямаагийн “Тэнгэрийн хаяа” дурсамжийг нүүдэлчдийн сүүлчийн дуулал гэж хэлье. Нэрт орчуулагч Г.Акимтай нэгэнтээ энэ номын тухай ярьж суух зуур ингэж хэлсэн нь оносон “тодорхойлолт” байв. Гэхдээ энд ярих зүйл “Тэнгэрийн хаяа” номын тухайд гэхээсээ илүү түүнийг яагаад “сүүлчийн” гэж тодорхойлохын шалтгаанд очиж холбогдоно.

Сүүлчийн гэсний тухайд. Сайнаар ч, муугаар ч яригддаг энэ цагийн өнгийг нүүдэлчдийн нүдээр нэг ажаад үзье гэвэл ерөнхийдөө эргэдэг жамаараа эргэх амьдралын хүрднээс хальж холдсон юмгүй. Гэхдээ л хаяа тэлж хурд нэмсэн их түрэлтэнд байсан болоод байгаа бүхнээсээ алдаж гээж яваа хазааргүй цагийн урсгал санж. Аж байдалд нь халгаатай ийм түрэлтийг хуучцуул цөвүүн цаг гэдэг. Цаг тийм ахул хэлэх гэснээ хэлж ч амжилгүй өнгөрдөг, хэлж гэмээ нь хаданд хашгирах мэт цуурайтаад замхардаг хэн нэгний үг хаанаа юусан билээ. Уг нь орчлонгийн шуурга даган уруудаж яваа, бас орчлонд одоохондоо орь ганц гэж хүлээн зөвшөөрөгддөг нүүдлийн соёлоосоо гээгдсээр буй бүхнийг анзаарч анхаараад, болдогсон бол үнэлж цэгнээд үлдээмээр. Гэвч үлдээмээр бичээч нь, тухайлбал малчны хотноос “соёолсон” хөдөөлөг задгай билиг авьяастан, авьяасаа дэлхийд дээд түвшний хэмээгддэг Горькийн сургуулийн онол номоор цэнэглэсэн, бас язгуурлаг болоод яруу тансаг монгол хэлээрээ хөглөсөн Д.Нямаа шиг нь даанч ховорджээ.

Нүүдэлчдийн юм гэхээр хоцрогдсон юмны тухай мэт болоод явчихдаг харамсалтай ч гэмээр мөчиг төсөөлөл нүүдэлчид бидний өөрсдийн дотор байдаг нь тоогүй. Сайжруулах, хөнгөвчлөх, боловсон болгох юмаа болголгүй яахав. Гэвч гээж үрмээргүй өв, гишгэлж сандаачмааргүй ахуй, цагийн шалгуураар төлжиж бойжсон ухаан, төлөвшиж боловсорсон ёс зүй тэнд бас байгаа. Оросын монголч эрдэмтэн Гумилёв “Нүүдэлчид түүхэн хөгжлийнхөө явцад нийгэм, соёлын давтагдашгүй бөгөөд хосгүй хэв шинжийг бүрдүүлсэн юм. Үүнийг зогсонги юмуу хоцрогдсон гэж үзэж хэрхэвч болохгүй. Нүүдэлчид өөрийн гэсэн дахин давтагдашгүй төрхийг бүтээж, өөртөө тохирч зохирсон шинжийг олсон ард түмэн” (Л.Н.Гумилёв. В поисках вымышленного царства М.,1992, с.5) хэмээсэн нь нүүдэлчдийн соёл, ахуйг нөгөө өөр бусад соёлтой харьцуулж судалсан харийн хүний үг ямар байдгийн нэг л жишээ.

“Тэнгэрийн хаяа”-нд өгүүлсэн шиг нүүдэлчдийн маань эгэл боргил атлаа энгүй хосгүй, нарийн нандин эд эсээр дүүрэн аж амьдрал, ахуй сэтгэл энэ цагт ямаршуухан болоод байгаа билээ гээд нэг бодвол бид их ч юмаа гээж, бас их юм гээхийн даваан дээр байна. Түрэлт хүчээ авсан цаг! Дэлхий даяаршлын, техник-технологийн, харь соёлын түрэлт! Яая гэхэв, замбуулинг буцааж ямар эргүүлэлтэй биш. Жишээ нь, одоогийн малчид ярьж байна. Адуу, тэмээ эмнэгшиж, уналга ачлаганых нь цөөрч байна гэж. Айл бүхэн л бараг гадаанаа “Портер” машинтай, хятад мотоцикльтой болчихоор аргагүй юм даа. Дэвшил! Тэмээн жин түүх болоод үлдсэн шиг тэмээ ачаалсан нүүдэл мөн л тэгж ингээд түүх болох нь ээ. Тэмээ ачаалж уул даваа даваад бэлчээрийн соргогт хүрдэг “зоригтой” нүүдэлчин хуруу дарам цөөрснөөс буурь бууц газар сайгүй эдгэрч байна. Ухаандаа, С.Дашдооровын төрсөн бууцан дээр очиж байснаа дурсаад, түүнийг мөн өөрийн төрсөн бууцтай харьцуулсныгаа:“…бодоход үе үеийнхэн бууцтайгаа хамт “хулширдаг” ч юм шиг…”гэж Д.Нямаагийн бичсэнчлэн.

Мөн малчид ярьж байна. Одоо цагт мотоциклиор хонио хариулж (хариулах ч гэж дээ сөргөж), морьтой хүнээс харин ч хонь үргэдэг болж байна гэж. Үүнийг сонссон улсын ерөнхийлөгч нь морио унахыг уриалж, телевизүүд “Морьтой монгол аян”, “Аргал” гэх мэт нэвтрүүлгийн байнгын булантай болж аргаа тасарч сууна. Нүүдэл суудал, сав сааль мэтээ жуулчдын үзэсгэлэн болгох юм ярьж байна. Нүүдлийн соёл ийм өрөвдөлтэй байдалд орох нь. Өнгө зүсээ “шинэчилж”, хэнд юунд зориулагдсанаа өөрчлөх нь.

Шинэчлэх гэснээс. Нүүдэлчдийн өвийн томоохон хэсэг нь зуунаар, мянганаар хуримтлагдаж ирсэн оюуны соёлын өв билээ. Үр ач нараа хүн болгож төлөвшүүлэхээс эхлээд үлгэр тууль хайлах, мал ахуйгаа эрхлэх, тоног хэрэгслээ хийх, од эрхэсийг “уншиж” тэнгэрийн араншинг тайлах наад захын эрдэм ухааныг нүүдэлчид л авч явж ирсэн, авсаар ч яваа.Гэвч энэ их дотоод оюун яаж алдагдаж гээгдэж байгааг гаднаас хараад хэлэх аргагүй. Юутай ч хуучны хийцийн юм ховордож, шинэ цагийн эд агуурс чанараа гээсэн тухай яриа захаас аван сонсдох болж. Хийж чаддаг байсан юмаа чадахаа больсон тухай л ярьж байна гэсэн үг шүү дээ. Бүхнийг хуванцраар, нийлэг мяндсаар орлуулах болсноор хөхүүр, шир, сур, дээс гээд олон юм одоо ч бараг нүдний гэм болох нь холгүй гэцгээнэ. Шир, сур хийх түүхий эд нь хил даваад хуванцар, мяндсаар солигдчихож байгаа юм хойно тэгэлгүй яахав. Тэнгэр хангай, од эрхэсийг шинждэг ёсон газар газарт өөр байх. Д.Нямаа номдоо өгүүлснээр бол говьд энэ арга ухаан их онцлогтой, бас баялаг аж. Өнөө цагт энэ агуу их эрдмийг харин гээж эхэлсэн нь тусгүй. Хэн дуртай нь амны зоргоор тааж бавдаг болж. Одоо чинь бороог хүртэл “төрөөс зохицуулах” ухааны юм ярьдаг болсон. Уул бүсэлж эрдэс ухах, үүл буудаж бороо оруулахыг нүүдэлчид огт таашаахгүй байгаа. Буудаж оруулсан борооны ус шим өгдөггүй гэж ярьцгаадаг.

Нүүдэлчдийн оюуны өв соёл ном ёсоороо хадгалагдаж арвижиж ирсэн тэр суурь ганхсан нь аль эрт, суурин соёл руугаа ханарах болсон цагаас билээ. Суурин соёлдоо идээшээгүй, өөрөөр хэлбэл төв болж төвхнөөгүй цагт сумын төв нь хүртэл айлуудаа дагаад нүүж явсан тухай Д.Нямаа өгүүлжээ. Төд удалгүй төвхнөсөн, за тэгээд хотожсон. Хоёрын хооронд хотжив гэсэн шиг хот хороо дамжих эргэлт буцалтгүй үйл явц зах зээлийн их задгайрал эхэлснээр бүр ч түргэссэн. Дээрээс нь нэмээд бодлого алдагдаж малчдын залуу халаа үе тасалдсан. Сүүлийн нэг жишээ, нийгмийн хандлагыг даган малчин айл өрх бүхэн бараг бүх хүүхдээ дээд сургууль төгсгөнө гээд зүтгэчихсэн. Тэдний нэлээн олон нь дээд боловсролтой гэсэн диплом л олж авснаас цаашгүй. Зарим нь одоо тогтсон ажил амьдралгүй, хотын гудамжаар зам заалгаад халтуур хийж явна. “Хүн олны урсгалд хөл нийлээ л бол” малчны хотноос ирснээ мартаж орхино. Гэтэл мал дагасаар насан өндөр болж төв бараадсан эцэг эх нь малын дөргүй шахам “малчин” хөлсөлж хэдэн малаа мануулчихаад өөрсдөө хөдөө, төв хоёрын хооронд ээлжгүй шогшиж байна. Малын дөргүй тэр малчин нүүдэлчний өв соёлыг яаж авч явахав?! Айраг сүүнд ус, ааруул аарцанд гурил холих “сүүхээтэй ухаан” энэ хавиас л гарч байгаа юм. Ингэхлээр тэр оюуны өв хаашаа явахав?

Ер нь амьдралынхаа хуулиар амнаас ам дамжин уламжлагдаж ирсэн оюуны соёлыг сургууль номоор дамжуулан сурталчлах, хичээлээр заах төдийхнөөр авч явна гэдэг хоорондоо тэс ондоо ойлголт бололтой. Ондоо байдгийн учир нь нүүдэлчдийн ахуй соёлын боловсрол, суурин газрын боловсрол хоёрын ялгаанаас улбаатай юм. Нүүдлийн соёлоо гээхгүй авч явъя гэсэн үзлээр байх, дунд сургуулийн бүр бага ангиас эхлээд сурах бичгийн агуулгад хүртэл тусгасан зүйл их бий. Харамсалтай нь тэнд дурдагдаад буй хом шат, буйл бурантаг, жолоо цулбуур, чөдөр ногт тэргүүтнийг өнөөгийн хотын хүүхэд байтугай багш нь ч сайн төсөөлөхгүй байна. Монгол ахуйн уламжлалт мөртлөө ямар нэгэн харь юм шиг болчихсон ойлголтыг хүүхдэд яаж тайлбарлах вэ гэдэг асуулт хотын сургуулиудын анги танхимуудад байнга гарч байна. Тэгээд тиймийг нь заахдаа ч, таньж мэдэхдээ ч тээршааж байгааг яахав? Нүдэн балай, чихэн дүлий яваад л байх уу?

Нүдэн балай гэснээс. Уул овоогоо дээдлэх зан үйл бол тусдаа том соёл. Говь гурван сайхан, Алтайн арван гурван сан мэтийн уул усны тахилга, лус савдагт залбирах ёсон өөрийн гэсэн дэг жаягтай, судар номтой ч. Харин их зам харгуй тосуулан хөтөл, онь барьж босгосон овоог морин өртөө үүссэн цагаас газрын чиг баримжаа тогтоох зорилгоор дэлгэрсэн гэж үздэг юм билээ. Одоо тэгтэл хөтөл болгоны овоо архины бөглөө мулталдаг газар болон учир утгаа алдаж, хайран сайхан даваан дээр хог новш овоорон, нөгөө чулуу нэмээд өнгөрдөг овоо нь (чулуу нэмэх ч бас овоогоо өндөрсгөж холоос харагддаг болгох гэсэн улаачдын ёсноос үүдэлтэй) архины шил, ундааны лааз мэтийн хэрэггүй хогоор дүүрч, дэргэд нь хүн амраад суух байтугай сэжиг хүрмээр дүр төрхтэй болчихсоныг яалтай. Заримыг нь орон нутаг цэвэрлэдэг ч дахиад л хог овоолчихдог гэсэн. Дээрээс нь хот тойрсон довцог бүхэн дээр хэн дуртай нь “хувийн” овоо босгож, энд тэндгүй мяндсан хадаг уядаг болж. Хувийн болгох сонирхол нь даамжирч байгаа юм болов уу, булаг шандад эзэн суухыг хүртэл санаархаж, болж өгвөл уулын ам хашиж авахыг боддог болж. Энэ бол нүүдэлчдийн соёлыг тэс ондоо зүг рүү гулдарч, завхруулж байгаа явдал.

Монгол гэр, дээл хувцас, морь, бөх бол нүүдэлчдийн соёлын гайхамшигтай өв. Гэтэл монгол хувцас хэрэглээний шинжээ алдахын хоёр туйл цухалзаад л байгаа. Одоо костюм ч юм уу, оготор хүрэм, пүүз өмссөн хүн мотоциклиор хонь, адуу тууж явахын тухайд бол бараг нүд дасчээ. Хятадад явж байхад шилбүүр сугавчилж малгай бүчилсэн хүн хэдэн хонины захад зогсч байгаа дүр зураг харагдах юм билээ, түүнээс өөрцгүй. Хонины захад нарны шүхэр бариад явж байгаа морьтой хүн бас л сонин харагддаг. “Ер нь шүхэр барьдаггүй үндэстэн гэвэл малчин монголчууд байсан байх ч юун магад. Тэр байтугай бүрх малгайг хүртэл “Морь үргэнэ” гээд нэг хэсэгтээ толгой дээр тавьдаггүй байсан” гэж Д.Нямаа бичжээ. Юмны зохимж гэж байх юм даа. Нөгөөтэйгүүр сайхан монгол хувцас маань хэрэглээний гэхээсээ зүгээр л гоёл чимэглэлийн буюу европ хэллэгээр декоратив чанартай (европчууд ингэж ярьж байгаа учраас) болж найр наадмын чимэг, загвар өмсгөлийн үүргээр илүү давуу хэрэглэгдэх болсныг нөгөө нэг туйл гэхээс өөр яахав. Өнгө хөөцөлдсөн газар мөн чанар гээгддэг, мөнгө хөөцөлдсөн газар хүн чанар гээгддэг гэдэг дээ.

Морь, бөхийн тухайд бол язгуур чанараа алдах тийшээгээ бүр яарах мэт явж байгаа. Морь, бөхтэй холбоотой монгол соёл ерөнхийдөө арилжааны замаар орсон гэж нэгэн дуугаар ярьцгааж байна, үнэн. “Одоо ч довтой тоот наадам хийж, доштой бүхэн нам байгуулдаг болсон цаг” гэж хөдөөний нэг өвгөн ярина лээ, ортой үг. Саяхан Монголын морин уяачдын холбоо хөр цастай хөлдүү газар зохион байгуулсан хурдан морьдын уралдаанд арван нэгэн хүүхэд мориноос унаж, нэг хүүхэд хөнгөн гэмтсэн тухай юу ч болоогүй юм шиг ярьж, үүнийг буруутгасан хүүхдийн эрхийг хамгаалах байгууллагыг бараг загнаж сууна лээ. Ингэхгүй бол морь уралдуулах наадам цэнгэл мөхөх гээд байна гээд. Аливаа зүйл хэрээс хэтэрвэл алдаж эндэж байж дуусдаг гашуун үнэн хаа ч тийм. Хурдан морь уралдуулах үеэр 2009 онд 158, 2010 онд 222, 2011 онд 254, 2012 онд 326 хүүхэд мориноос унаж олон хүүхэд бэртэж гэмтсэн, энүүхэн хугацаанд хорь гаруй хүүхэд соёолж буй нялх ногоотой хамт морины хөлд талхлагдан хорвоогоос буцсан тухай хэдэн тоог харахад л аюул жилээс жилд өссөөр ирснийг гэрчилж байна. Ашиг олж, алдар хэргэмээ зузаалж, аархаж баярхсан хэдэн хүн зугаацаж л байвал алдах эндэхийн тухай боддоггүй бололтой. Ер нь хэтэрхий хөөргөдөж, хэтэрхий шунаж соёлоо, бас ёс зүйгээ баллаж болно. До.Цэнджавын “Тэнгэрт хальсан тоос” туужид ч үүнийг л мөн өгүүлжээ. Нөгөө л цөвүүн цагийн харанга дэлдсэн зохиолуудын нэг. Ёс зүйгээ, хэл соёлоо дархлан тээж явагч нь яалт ч үгүй тухайн цагийн гярхай шинжлэгч уран зохиол юм даа.

Хэл гэснээс. “Тэнгэрийн хаяа” бол сайхан монгол хэлний сувдан шигтгээ гайхамшиг. Язгуураас нь олж авсныхаа хувьд монгол хэлний “амт шимтийг” Долгорын Нямаа харуулахгүй өөр хэн харуулахав. Тэгээд ч тэр амт шимт нүүдэлчин ахуйгаасаа л илүү мэдрэгддэг билээ. Зүгээр л нэг уулын мухарт суугаа малчин өвгөний амнаас дүрслэн илэрхийлэх чанараараа гойд ончтой ийм “сувдан шигтгээ” аль олон гарахыг тэр гэхэв. Д.Нямаагийнхаас ч бас алийг тэр гэхэв. Тэнд дурдагдах “салхи буруудвал сүү гашилдаг”, “тэнгэр инээх өдөр”, “мичид тогоо өнгийх”, “мичид зулзгалах”, “сар шээх” гэх зэрэг хэлц мэт өгүүлэмжийн цаана агуулагдаж буй нүүдэлчин хүн арга ухаанаа цэгнэх, ажил төрлөө зохицуулах хэмжээний гүн гүнзгий учир холбогдолтой нэг ёсон харамсалтай нь бас л тэгж ингээд гээгдэх нь ээ. Д.Нямаа нэгэн ярилцлагадаа өчсөн байна лээ. “Энд тэнд явж байхад хөдөө нутаг эзгүйрч байгаа нь харагдах гээд байх болсон. Энэ эзгүйрэл бидний сэтгэлгээ, уран бүтээлд бууж ирэх гээд байх шиг. Үүнийг дагаад монгол хэлний олон үг алга болно гэж бодохоос аймшигтай” гэж. Үүн лүгээ давтан өчихүл нүүдэлчин соёлоо эрэмдэглэх нь монгол хэлээ эрэмдэглэхийн үүд. Аливаа хэл соёлынхоо тусгал гэдэг утгаараа тийм.

Өнөө цагт үзэх зугаацах юм нь элбэгийнх үү, ном уншихаа больж. “Хорьдугаар зууны Монголын утга зохиолоос битгий сал. Хамаг сайхан монгол хэл минь тэнд хавтаслагдаад үлдсэн… Хорьдугаар зууны утга зохиолыг дандаа хөдөө төрсөн, хөдөөгийн ард түмний дунд өссөн цэвэр монгол хэлтэй зохиолчид бичсэн шүү” гэж Д.Нямаа захиж байна. Энэ бол хэлээ алдчих вий гэсэн болгоомжлол юм. Уран зохиол уншихгүй, хэл соёлоо судлахгүй бол хэлээ алдана. Бичиг үсгээ соливол бас хэлээ алдана. Дэлхийн улс гүрнүүд бичгээ сольё гээд ч сольж чаддаггүйн учир юу вэ гэвэл хэлний когнитив буюу танин мэдэхүйн үүрэг алдагдах аюултай. Ямарваа үндэстэн эх хэлнийхээ танин мэдэхүйн арвин их сан хөмрөгийг хагас дутуу хөрвүүлсэн бичиг үсэгт шилжээд зөвхөн коммуникатив буюу харилцааны үүргээр нь үлдээвэл тэр хэлний оршин тогтнох суурийг баллана гэсэн үг. Учир нь харилцаан дахь үгсийн сан нийт үгсийн сангийн өчүүхэн төдий хэсэг байхаас гадна найруулга нь ч мөн төгс бус, ядмаг шинжтэй байдаг. Харилцааны найруулгыг тэжээж, цэнэглэж, үгсийн санг нь эргэлдүүлж байдаг эх үүсвэр нь тухайн хэлний сан хөмрөг, өөрөөр хэлбэл уран зохиол билээ.

Америкийн индианчууд, Австралийн аборигенүүд гадны соёлын түрэлтэнд орохдоо гуугчиж хашгичсаар язгуур соёлоо гээж хэлээ мартаад хэн ч биш болж түүхийн хүрдэнд “зажлуулах” мэт золиослогдсон юм гэнэ лээ. Бид эрх биш тусгаар тогтносон эх нутагтаа эзэн суугаа болохоор амгалан сайхан л байцгаана. Тэгээд ч тэр үү, техник, технологийн гэх жолоогүй хоморгонд автаж, цаг тооны хазааргүй урагшлах нүргээнт эргүүлэгт орсон энэ эринд эх дэлхий, унаган байгалдаа шимтэн, бас зохицон аж төрж яваа цорын ганц иргэншлийг тээгч нүүдэлчин монгол хүний амар амгаланд гадныхан атаархаж сууна. Гэвч бид нүүдэлчин соёлоо гээсээр л байна.

Ц.Магсар (МУБИС, доктор Ph., профессор)

“Увертура” хамтлагийн ахлагч, дуучин Гочоогийн Пүрэвдагватай уулзаж уран бүтээлийн яриа өрнүүллээ.

–Танай хамтлагийнхан сүүлийн үед ямар уран бүтээл туурвиж байна?

-Манай хамтлаг он гарсаар хэд хэдэн дуугаа бичүүллээ. “Морин хуур” наадмын шилдэг арван дуугаар төрийн шагналт, ардын уран зохиолч Сэнгийн Эрдэнэ гуайн шүлэг, урлагийн гавьяат зүтгэлтэн, Хөгжим бүжгийн коллежийн төгөлдөр хуурын багш Насанбатын аялгуу “Манан” дуу маань шалгарсанд баяртай байна. Саяхан “Анир” студийн маань продюссер, соёлын тэргүүний ажилтан Алтанхуяг ахын хөгжим, МЗЭ-ийн шагналт яруу найрагч Даваасүрэнгийн Ган-Очирын шүлэг “Хөх тэнгэрийн Монгол” дуун дээр ажиллаж байгаа. Ноднин жил Алунгоо эхийн сургаалийн баяр болох үед гаргасан дуугаа, “Хөх тэнгэрийн Монгол” дуутайгаа дүрсжүүлэхээр ажиллаж байна даа. Ирэх намраас Алтанхуяг ахын хөгжмийг нь бичсэн нэг мюзиклээ үзэгчдэдээ толилуулна.

–Анхны “Удиртгал”-аасаа хойш цомог гаргасан билүү?

-Хамтлаг үүсэн байгуулагдсаны гурван жилийн ойд зориулсан “Удиртгал” цомгоосоо хойш цомгоо гаргаагүй. 2013 онд Улсын драмын эрдмийн театрт хоёр удаа, үзэгчдийн хүсэлтээр “Улаанбаатар палас”-ын концертын их танхимд тоглосон “Төгсгөлгүй эхлэл” тоглолтынхоо DVD-ийг гаргахаар төлөвлөөд ажиллаж байна.

-“Төгсгөлгүй эхлэл” тоглолт чинь үнэхээр сайхан болсон шүү. Үзэгчид бүгд босоод арав гаруй минут алга ташин та бүхэнд хүндэтгэл үзүүлж байсан даа?

-Анх хамтлаг байгуулахдаа олон зорилт тавьж байсны хамгийн том нь монгол поп опера урсгалыг хөгжүүлэх гэсэн чин хүсэл байсан. Монгол поп опера зуун хувь оркестртой, зуун хувь амьдаар дуулаад, тайзны шийдэл нь шал өөрөөр шийдэж, драмчилсан маягаар тоглогдсон. Тоглолт маань маш сайхан амжилттай болсон. Үзэгчид арван минут тасралтгүй алга ташихад “баярлалаа” гэхээс өөр хэлэх ч үг олдоогүй. “Улаанбаатар палас”-ын концертын их танхим гэхэд бараг ерэн хувийн дүүргэлттэй байсан.

–Төрийн шагналт Д.Со­сор­барам танай хамтлагийг их дэмждэг санагддаг?

-“Анир” студийн дэргэд 2009 онд “Увертура” хамтлаг байгуулагдаж байх үед Д.Сосорбарам ах “Үлэмжийн чанар” цомгоо гаргаж байсан юм. Тэр үед Со ахтайгаа бид танилцаад, Хонгор нутгийн хүний хувьд өнөөг хүртэл дэмжиж, сэтгэлийн сайхан гэрлээ хуваалцаж, уран бүтээлийн маань зам харгуйг засалцаж яваад туйлын баяртай байдаг. Гавьяат жүжигчин “том” Жаргалсайхан ахын аялгуу, Со ахын урын санд байдаг “Жамаас” дууг бид дуулж, хүмүүст нэлээд хүрлээ. Төрийн шагналт Б.Шарав гуайн “Илүү сартай зун” уран сайхны кинонд хийсэн аялгуунд Со ах үг зохиож “Цагийн аяс” гэж сайхан дуу бүтээснийг манай хамтлаг бас дуулсан.

-“Увертура” хамтлагийн дуулсан “Өнө мөнх эх орон”, “Тэнгэр ээж минь өршөө”, “Дөрвөн цагийн тал”, “Монгол минь тэнд бий” гээд бүх дуунууд хит болоод байдгийн нууц юунд байна?

-Биднийг гарч ирэх үед поп опера урсгалаар дуулдаг “Ньюанс” хамтлаг уран бүтээлээ туурвиж байсан. “Классик жем” хамтлаг байлаа. Бид дөрвийн хувьд Хөгжим бүжгийн коллежийг дуурийн дуулаач мэргэжлээр дүүргэсэн. Тиймээс мэргэжлийнхээ дагуу үндэснийхээ дуунуудыг поп опера чиглэлээр дуулж эхэлсэн. “Мандах нар” ардын дуу, Б.Шаравын “Өнө мөнх эх орон”, урлагийн гавьяат зүтгэлтэн хөгжмийн зохиолч Т.Сэр-Одын аялгуу, зохиолч Б.Цогнэмэхийн “Тэнгэрийн хүү” жүжгийн дууг дууллаа. Төрийн шагналт яруу найрагч Очирбатын Дашбалбарын “Амьддаа бие биеэ хайрла” шүлгэнд аялгуу зохиолгож үзлээ. Төрөл бүрийн янз бүрийн туршилтуудыг хийж байна. Энэ бүхэнд цаг хугацаа, судалгаа маш их шаарддаг юм байна. Хамтлаг маань байгуулагдаад зургаан жил болох хугацаанд монгол поп опера чиглэлийг л бий болгох гэж хичээж, уран бүтээлээ туурвиж явна даа.

-“Увертура” хамтлаг “Анир” студийн дэргэдэх гэсэн хаягтай явдаг. Танай хамтлагийн продюссор Б.Алтанхуяг гэж ямар хүн байна?

-Польшид хөгжмийн зохиолч, найруулагчаар мэргэжил дээшлүүлсэн хүн. Орчин үеийн нийтийн дууны бараг наяад хувийн хөгжмийн найруулгыг хийсэн, сүүлийн үед олон дуу зохиосон, бүжиг, жүжиг, киноны хөгжим дээр ажилласан уран бүтээлийн туршлагатай хүн байгаа.

–Хамтлагийнхан чинь нэг ангийнхан юм байна. Харин уг гарал хаанахын хүмүүс билээ?

-Л.Ренчинням маань Хөвсгөл аймгийн Ренчинлхүмбэ сумын уугуул, хөдөөнөөс манай ангид ирж байсан. Атардээжийн Шинэбаяр маань Төв аймгийн Угтаалцайдам сумын гаралтай, хотод төрсөн хүн. Ж.Ганбаатар Өмнөговь угшилтай. Би аавынхаа нутгаар Баянхонгор аймгийн Заг сумынх гэж явдаг. Бид гурав хотын унаган хүүхдүүд л дээ. Бид дөрвүүлээ гэр бүлтэй. Шинэбаяр маань саяхан хүүтэй болсон. Ганбаатар удахгүй үрийн зулай үнэрлэнэ.

–Аавынхаа төрсөн нутаг Загийн голд очиж байв уу?

-Бүүр жаахан хүүхэд байхдаа очиж байсан. Загийн голд аавтайгаа хамт сэлж байснаа сайн санадаг юм. Дурсгалтай сайхан үе байж. Аав маань одоо бурхны оронд одож дээ. Сүүлд Сономын Лувсанвандан гуайн ойгоор Баянхонгорын Хөгжимт жүжгийн театрт очиж тоглолт хийж байсан. Аавынхаа нутгаар тав тухтай очно гэж бодож явдаг даа.

-“Төгсгөлгүй эхлэл” тоглолтоо гадаад улс оронд толилуулахгүй юм уу?

-Тоглолтоос хойш олон хүн санал тавьж байсан л даа. Мэргэжлийн өндөр түвшинд симфони оркестртой тоглох бодолтой байгаа. Тэрнээс нэг жижиг шөнийн цэнгээний газар ч юм уу, тоглоно гэхэд тиймхэн байна л даа. Япон, Солонгосын үзэгчдэд монгол поп опера чиглэлийн тоглолтоо бүрэн хэмжээгээр толилуулах талаар арга сүвэгчилж л байна.

–Уран бүтээл хийхэд эдийн засгийн хөшүүрэггүйгээр урагшаа явахад мэдээж хэцүү байж таарна?

-Хамтлаг байгуулагдахдаа “Анир” студиэ түшиглэсэн. Би энэ студидээ дууны инженер-найруулагч хийдэг. Уран бүтээл маань оргилж байдаг газар маань энэ студи. Энд бид хөгжмийн зохиолч, яруу найрагчидтайгаа уулзаж бүтээлээ амилуулдаг. Манай хамтлаг 2013-2014 онд “Төрийн банк”-ны элч хамтлаг гэсэн хамтарсан гэрээ байгуулж ажиллаж байгаа болохоор уран бүтээлээ толгой өвдөхгүй хийж байна.

–Удаахь тоглолтыг чинь үзэгчид их хүсэн хүлээж байгаа даа?

-Хоёр дахь бие даасан тоглолтоо энэ жилийн арваннэгдүгээр сард үзэгчдэдээ толилуулахаар уран бүтээлийн ажилдаа ороод явж байна.

Анхны DVD, хоёрдахь цомгоо гаргахад бэлэн болчихсон, мюзиклээ бэлдээд явж байгаа гээд буцалж бужигнасан үйл хэрэг өмнө минь байж байна даа.

Л.Батцэнгэл