МУГЖ Д.Алтанхуяг сангийнхаа дэргэд “Монголын шинэ балет” нэртэй сургууль байгуулахаар болжээ. Түүний ажилладаг Бостоны балетын сургууль нь Хойд Америкийн хамгийн шилдэг сургуульд тооцогддог тул туршлага судлан эх орондоо олон улсад үнэлэгдэхүйц бүжигчдийг бэлтгэх сургууль нээхээр шийдсэн аж. Тэрээр “Цөмөөхэй” бүжгэн жүжгийг өнгөрөгч онд шинэчлэн АНУ-ын “Бостон балет” компаний тайзнаа тоглогддог тайз чимэглэл, хувцас хэрэглэлийг авчирч, дэлхийн стандартад хүрсэн тоглолтыг Монголын үзэгчиддээ хүргэсэн бол энэ жилийн “Цөмөөхэй” ч мөн олон онцлогтойгоор тавигдах гэнэ. Хамгийн том шинэчлэлт бол гол дүрийн Клара охины дүрд сонгон шалгаруулалт явуулж байгаа бөгөөд 260 гаруй хүүхэд үүнд оролцжээ. Өнгөрсөн долоо хоногт эх орондоо хөл тавьсан тэрээр энэ удаа Клара охин болоод бусад дүрүүдээ сонгон шалгаруулах зорилготой иржээ.
Энэ жил гол дүрийн шалгаруулалтад тэнцсэн хүүхдүүдэд сургуульдаа бүтэн жил үнэгүй сурах тэтгэлгийг олгох гэнэ.
“ДОЗ” энтертайментийн бүтээл болох “Элэг нэгтэн” уран сайхны кино Энэтхэг улсын Дели хотод болсон “Нойда” олон улсын кино наадмаас шагнал хүртсэн байна. Энэ талаар жүжигчин А.Мөнгөнзул “Энэтхэгийн Дэли хотын “Нойда” олон улсын кино наадамд 21 улс орны кино оролцож бидний хийсэн /найруулагч Ш.Доржсүрэн/ “Элэг нэгтэн” (МУСК) шагнал авлаа. “Элэг нэгтэн” киноны олон улсын хоёр дахь шагнал боллоо. Энэ бол бидний жинхэнэ хөдөлмөрийн амт. Энэхүү киноны төлөө хөлсөө урсгаж, сэтгэлээ өгсөнд хүн бүхэнд “ДОЗ ПЛАС” энтертайнментын өмнөөс баярлаж байна. Удахгүй цомоо аваад очлоо шүү манайхан. Монголын кино урлагийн зам үргэлж гэрэлтэх болтугай” гэжээ. 
Попера урсгалаар уран бүтээлээ туурвидаг “Нюанс” хамтлагийнхан Өвөрхангай аймгийг өнөө өглөө зорилоо. Тэд Өвөрхангай аймгийн төвд хоёр удаа тоглох гэнэ. Тус хамтлагийнхан тоглолтын орлогоо хүнд өвчинд нэрвэгдээд байгаа Хархорин сумын харьяат Л.Дамдинсүрэнгийн эмчилгээний зардал, эм тарианд хандивлахаар болжээ. Тйимээс тус хамтлагийн зүгээс энэхүү хандивын үйл ажиллагаанд дэмжлэг болгож Монгол ахан дүүсээ халуун сэтгэлээр тусалж дэмжихийг уриалж байгаа аж. “Нюанс” хамтлаг тоглолтын орлогоо хандивлаж байсан нь ганц энэ удаагийнх биш. Тус хамтлагийнхан урьд нь элэг нэгтэй Монгол угсаатай Буриад, Халимаг улсуудад тоглолт хийх явцдаа амьдралын түвшин доогуур, өвчин зовлонд нэрвэгдсэн болон өнчин хүүхдүүдэд сайн санааны үүднээс тоглолтын орлогоосоо хандивлан туслан дэмжсээр ирсэн юм.
Улаанбаатарын залууст электроник хөгжмийн ертөнцөөр аялж, орчин үеийн хөгжмийн урсгалыг мэдрэх боломжийг олгох “Castle Club” өнөөдөр нээлтээ хийх гэж байна. Бээжин хотын номер нэг Underground клуб болох “Lantern Club”-д DJ хийдэг Билигүүдэй хэмээх залуу эх орондоо орчин үеийн хөгжмийн урсгалыг хөгжүүлэх хүсэлдээ хөтлөгдөн Үндэсний соёл амралтын хүрээлэнд ийнхүү “Castle Club”-ээ нээж буй нь энэ юм.
П.И.Чайковскийн нэрэмжит уралдааны гранпри шагнал хүртсэнээсээ хойш дэлхийн алдарт тайзнаа уригдан дуулж байгаа Гавьяат жүжигчин Г.Ариунбаатар эх орондоо “Монгол сонгодог” бие даасан тоглолтоо хийхээр болжээ. Тэрээр 2012 онд М.Глинкийн уралдаанд түрүүлж, Гавьяат жүжигчин цолоор шагнуулсныхаа дараа ард түмэндээ “Монгол сонгодог” тоглолтоо хүргэж байсан билээ.
Монгол туулийн гал голомтыг хадгалж, үеэс үед уламжлан улмаар залуу үедээ өвлүүлэн сургаж буй үе үеийн туульчид өнөөдөр буюу арваннэгдүгээр сарын 18-нд Богд хааны ордон музей дэх Хаан туулсийн өргөөндөө өөрийн шавь нартайгаа хамтран “Монгол туульчид” бэсрэг тоглолт хийлээ. Алс хязгаарын Ховд, Увс, Баянхонгор болон Дорноговийн туульчид өөрийн шавь нартайгаа хүрэлцэн ирж уламжлалт туулиудаас хайлсан юм.
АНУ-ын Охайо мужид олон улсын шог зураачдын нийгэмлэгийн 24 дэх чуулган энэ сарын 8-13-нд болж 200 гаруй уран бүтээлж оролцжээ. Шилдэг зураачдыг тодруулдаг тус чуулганд Монголоос зураач Ч.Ганбаатар өнгөний гүйцэтгэл ангилалд тэргүүн байр, Л.Мөнхтөр гайхалтай гурван хэмжээст арга барил төрөлд II байр эзэлжээ. Мөн шилдэг 10 шог зураачийг шалгаруулахад Ч.Ганбаатар V байрт орсон байна.Тэрээр өнгөрсөн жил АНУ-ын Невада мужийн Рено хотод болсон чуулганд оролцож 250 гаруй зураачаас шилдэг өнгөний гүйцэтгэл, хэтрүүлэгтэй хэв маяг, Исайл Ролданы нэрэмжит болон Себастиан Крүгэрийн нэрэмжит “Хүндэт зочин” шагналын эзэн болж шилдэг 10 бүтээлээс IV байрт орж байжээ.
Улсын Филармони нь Монгол улсын Засгийн газар, /БСШУЯ/-аас хэрэгжүүлж буй “Сонгодог урлаг II” үндэсний хөтөлбөр, бүх нийтийн хөгжмийн боловсролыг дэмжих “ХӨГЖИМ” хөтөлбөрийн хүрээнд “Сонгодог хөгжим” зорилтот төслийг санаачлан хэрэгжүүлж байгаа билээ. Уг төслийн хүрээнд Морин хуурын чуулга, Симфони найрал хөгжим, Баянмонгол жазз найрал хөгжим, дуучдын нийт долоон концерт тоглоно.
Монголын дизайнерын холбооноос зохион байгуулдаг “Гоёл-2016” загварын шоуны сонгон шалгаруулалт энэ сарын 26-29-ний өдрүүдэд болох гэж байна. Шалгарсан 20 гаруй дизайнерын бүтээлийг тайзнаа амилуулах аж. Мөн шилдэг 70-80 үаньах өмсөгч оролцоно.
Улсын Филармони нь Монгол улсын Засгийн газар, /БСШУЯ/-аас хэрэгжүүлж буй “Сонгодог урлаг II” үндэсний хөтөлбөр, бүх нийтийн хөгжмийн боловсролыг дэмжих “ХӨГЖИМ” хөтөлбөрийн хүрээнд “Сонгодог хөгжим” зорилтот төслийг санаачлан хэрэгжүүлж байгаа билээ. Энэхүү зорилтот төсөл нь хүн төрөлхтний соёлын үнэт өв дэлхийн суут хөгжмийн зохиолчдын сор бүтээлээр урын сангаа баяжуулан урлагийн бүтээл туурвиж, нийслэл хотын үзэгч сонсогчид, олон нийтийн хөгжмийн боловсролыг дэмжих, дээшлүүлэх зорилгоор эхлүүлээд байгаа аж. Түүнчлэн уг төслийн хүрээнд Морин хуурын чуулга, Симфони найрал хөгжим, Баянмонгол жазз найрал хөгжим, дуучдын нийт 7 концерт тоглох ба төлөвлөгөөний дагуу тоглолтууд нь үзэгчдийн хүртээл болж байна.