“Хурд” хамтлаг Олон улсын эмэгтэйчүүдийн эрхийг хамгаалах өдрийг тохиолдуулан Инээмсэглэ бүсгүйчүүд” тоглолтыг зохион байгуулсан билээ. Харин Монгол цэргийн өдрийг тохиолдуулан эрчүүддээ зориулж “Цэргийн бодол” тоглолтоо толилуулахаар болсон байна. Тус тоглолт өнөөдөр 20.00 цагаас “Castle” клубт болно. Тасалбарын үнэ 30-50 мянган төгрөгийн үнэтэй худалдаалагдаж байна. Мөн энэ өдөр Улаанбаатар хотод болох зарим үзвэр үйлчилгээний хуваарийг танилцуулж байна.
-Улсын Филармонийн Баянмонгол жазз найрал хөгжимчид “Сэтгэлд хоногшсон дуунууд” концертыг тоглохоор болжээ. Тоглолтод Баян монгол чуулгаас төрөн гарсан үе үеийн хөгжмийн зохиолчдын бүтээн туурвисан “Цэнгэлтэй үдэш”, “Зулзаган цагаан хус”, “Навчин дээрхи шүүдэр”, “Дөрвөн улирал хоёр амраг”, “Аяны шувууд”, ”Энэ хүүхнүүд үү” зэрэг хуучны дууг толилуулах аж. Мөн Улсын филармонийн дуучин С.Баттулга, Т.Амина, Б.Дэлгэрбаяр, Б.Солонго, Л.Насанбуян, С.Нямбаяр, П.Өнөржаргал, Б.Наранбаатар нар оролцох юм байна. Уг тоглолт өнөөдөр 19.00 цагт Улсын Филармонийн концертын танхимд болно.
-МУГЖ С.Жавхлан, МУГЖ Т.Баясгалан нарын “Илгээлтийн эзэд” төслийн хүрээнд зохион байгуулж буй “Хаврын найраг” тоглолт энэ сарын 14,16-ны өдрүүдэд “Монгол бөхийн өргөө”-нд болсон. Харин Монгол цэргийн өдрийг тохиолдуулан тус тоглолтыг дахин сонирхуулахаар болсон байна. Тоглолт маргааш буюу бямба гаригт 19.00 цагаас “Монгол бөхийн өргөө”-нд болно.
-Хошин урлагийн “Шинэ үе” продакшн хоёрдугаар сарын 27-нөөс өдөр бүр “Сенсацитай хосууд” хошин шоу тоглолтыг толилуулж байна. Тус тоглолт “Соёлын төв өргөө”-нд 19.00 цагтаас болно.
-Дуучин Т.Солонгийн “Хотын болзоо” бие даасан тоглолтоо энэ өдөр үзэгчдэд хүргэнэ. Тоглолтод дуучин Т.Солонго өөрийн бие даасан уран бүтээлүүдээсээ толилуулахаас гадна түүнтэй хамтран дуулсан хамтлаг дуучид урилгаар оролцох аж. Тухайлбал, МУГЖ дуучин Б.Дашдондог, продюсер, төгөлдөр хуурч Б.Чинбат, Sweetymotion хамтлаг, дуучин С.Сэрчмаа, Б.Баярцэцэг, Ж.Буянаа болон Э.Энхзол нар хамтран дуулах аж. Тоглолт өнөөдөр 20.00 цагтаас “Salm” пабд болно.
-Увертюра” хамтлагийн “Надад үлдсэн найз” мюзикл тоглолтыг эр цэргийн баярт зориулан тайзнаа дахин тавихаар болжээ.Тоглолтын зохиолчоор “Милл” кино компанийн зохиолч Д.Мөнхбат, Ерөнхий найруулагчаар Л.Лхагважаргал, туслах найруулагчаар Ц.Баясгалан ажиллах бол дүрүүдэд “Увертюра” хамтлаг, төрийн соёрхолт Ц.Төмөрбаатар, МУСТА Б. Нармандах, МУСТА Ц.Баясгалан, бүжигчин Э.Эрдэнэцэцэг нар тоглох аж. Уг мюзикл нь өнөөдөр Тусгаар тогтнолын ордонд 19.00 цагаас болно.
Улсын Филармонийн “Баянмонгол” жазз найрал хөгжмийн хамт олон “Монгол цэргийн өдөр”-т зориулсан “Сэтгэлд хоногшсон дуунууд” баярын тоглолтоо маргааш өөрийн тайзнаа зохион байгуулах гэж байна.
Үндэсний Дуу Бүжгийн Эрдмийн Чуулгын уран бүтээлчид Монголын анхны ардын бүжгэн жүжиг болох “Нарны домог”-ыг тоглох гэж байна. Хөдөлмөрийн баатар, Төрийн шагналт АЖ, Д.Лувсаншаравын 90 жил, Төрийн соёрхолт УГЗ С.Сүхбаатарын урлагт зүтгэсэн 45 жилийн ойд зориулан энэхүү хүндэтгэлийн тоглолтыг толилуулахаар болжээ.
Mонголын Урлагийн Зөвлөл (МУЗ)-өөс санаачлан Ази-Европын Сангийн дэмжлэгтэйгээр соёлын олон төрлийг хөгжүүлэх, техник технологийн дэвшилд тулгуурласан дэлхийн шилдэг бүтээлийг Монголын үзэгчдэд хүргэх, дүрслэх урлагийн салбарын олон улсын хамтын ажиллагааг нэмэгдүүлэх зорилгоор “Улаанбаатар” олон улсын медиа урлагийн наадмыг 2016 оны 6 сарын 9-нөөс 7 сарын 9-ний хооронд анх удаа зохион байгуулахаар болжээ. 
Дуучин Т.Солонго Цэрэг эрсийн баярт зориулан “Хотын болзоо” бие даасан тоглолтоо энэ сарын 18-ны өдөр хийх гэж байна.
Энэ сарын 4-нөөс 13-ны хооронд Осакад Азийн кино наадам амжилттай болж өндөрлөв. Тус наадамд найруулагч Б.Үйзэнмаа “Don`t look at me that way” бүтээлээрээ оролцож, “Most promising talent award” шагнал хүртсэн байна. Германы Баварийн кино наадмын “Шилдэг залуу найруулагч”-аар тодорсон тэрбээр шинэ киноны төсөл бичиж эхэлжээ. Б.Үйзэнмаа 1984 оноос Германд амьдарч, Мюнхений кино телевизийн дээд сургууль төгсчээ. 2007-2011 онд дээрх уран бүтээлээс гадна гурван кино хийсэн байна. Б.Үйзэнмаа нь урлагийн гэр бүлээс гаралтай нэгэн бөгөөд аав Борхүү нь зураач, ах нь мөн найруулагч аж. Түүний “Над руу ингэж битгий хар” кино “Кино шүүмжлэгчдийн олон улсын холбоо”-ны шагнал, Испанийн REC наадмаас шагнал хүртэж байжээ.
Нийслэлийн Засаг даргын Тамгын газар АНУ-ын Филадельфийн Симфони найрал хөгжмийн чуулга хооронд хамтран ажиллах тухай Санамж бичигт Элчин сайд Б.Алтангэрэл, тус чуулгын Ерөнхийлөгч Аллисон Вулгамор нар 2016 оны 3 дугаар сарын 3-ны өдөр Конгрессын ордонд гарын үсэг зурсан. Энэхүү Санамж бичгийн дагуу АНУ-д төдийгүй дэлхийд нэртэй Филадельфийн Симфони найрал хөгжмийн чуулга 2017 оны 6 дугаар сард Улаанбаатар хотод зочлон бүрэн бүрэлдэхүүнээрээ тоглох болсон.
“Монгол циркийн хөгжлийн төв” төрийн бус байгууллага, Монголын үндэсний цирктэй хамтран зохион байгуулдаг “Дэлхийн цирк Монголд 2016” олон улсын циркдийн хамтарсан тоглолт гурав дахь удаагаа болох гэж байна. Тус тоглолтод Монгол, БНАСАУ, АНУ, Англи, Канад, Испани, БНХАУ, ОХУ, Украин, Вьетнам зэрэг 12 орны 60 гаруй А зэрэглэлийн шилдэг жүжигчид оролцох юм байна.