Category: эдийн-засаг

УИХ дахь МАН-ын бүлэг хуралдлаа. Хурлаар хэлэлцсэн асуудлын талаар бүлгийн дарга Д.Хаянхярваа, Ж.Энхбаяр, Б.Жавхлан нар мэдээлэл хийлээ.

Бүлгийн хурлын үеэр УИХ-ын гишүүн Ж.Энхбаяраар ахлуулсан ажлын хэсэг Хөгжлийн банкинд хийсэн шалгалтын дүнг танилцуулжээ.

Бүлгийн дарга Д.Хаянхярваа, “Хөгжлийн банктай холбоотой асуудлыг хэн нэгэн хүн рүү хандаж эзэн биегүй ярихгүй. Болсон юмыг болоогүй мэт, болоогүй зүйлийг болсон мэт яриад яваад байдаг. Өнөөдрөөс эхлээд ийм зүйлд цэг тавина. Яагаад гэвэл Хөгжлийн банкны шалгалтын материалыг нууцын зэрэглэлээс гаргасан. Гэхдээ бүх зээлдэгч нарын мэдээллийг нийтэд цацахгүй. Хамгийн анхаарал татсан асуудлыг дэлгэнэ. Ардчилсан намын бүлгийн дарга С.Эрдэнэ “Хөгжлийн банк 580 сая ам.долларын бонд босгосон. Тэр хөрөнгөөр хүний хөгжлийн 21 мянган төгрөг олгоход зарцуулаад дууссан” гэж хэлсэн. Тухайн үед би Сангийн сайд байсан. Хөгжлийн банкны босгосон 580 сая ам.доллараас нэг цент зарцуулалгүй эд нарт хүлээлгэж өгсөн. Хамгийн эхний гүйлгээ нь наймдугаар сарын 27-нд эхэлсэн байдаг. Цаашид эзэн биегүй ярихгүй гэдэг шийдэлд хүрсэн” гэлээ.

Ийнхүү МАН-ын бүлгийн дарга Д.Хаянхярваа бүлгийн хурлаар хэлэлцсэн асуудлаар мэдээлэл өгсний дараа УИХ-ын гишүүн Ж.Энхбаяр Хөгжлийн банкинд хийсэн шалгалтын талаар танилцуулсан юм.

Нэг ам.доллар өнөөдрийн байдлаар 2508 төгрөгтэй тэнцэж байна. Энэ нь оны эхнээс 10 төгрөгөөр өссөн үзүүлэлт юм байна. Өнгөрсөн арваннэгдүгээр сард 2720 болсон ам.долларын ханш 250 төгрөгөөр буурснаас хойш нэг хэсэгтээ л тогтвортой байсан бол өнгөрсөн баасан гаригаас эхлээд цөөн төгрөгөөр нэмэгджээ.

Мэргэжлийн хяналтын байгууллагаас хийсэн хяналт шалгалтын ажлын хүрээнд Монгол Улсын нутаг дэвсгэрт хууль бусаар алт олборлож байсан ААН-үүдээс захиргааны журмаар хураан авсан 923.26 сорьцтой 482.3 грамм алтыг Монголбанкны Эрдэнэсийн санд хүлээлгэн өгчээ.

Энэхүү алтыг МХЕГ-ын Захиргааны журмаар хураасан эд зүйлийг улсын орлого болгох, үнэлэх, худалдах, устгах зөвлөлийн шийдвэрийн дагуу улсын орлого болгосон байна.

Өнгөрсөн оны 11 дүгээр сард 2720
төгрөгтэй тэнцсэн ам.долларын ханш өнөөдөр 2500 төгрөгтэй тэнцэж, дахин
өсч эхэллээ. Ам.долларын ханшийн савалгаанаас арилжааны банкууд ашиг
хийсэн гэх шүүмжлэл ч тухайн үед гарч байсан.

Өнөөдөр 11:15 цагийн байдлаар “Найман
шарга” захад нэг ам.долларыг зарах ханш 2500, авах ханш нь 2498
төгрөгтэй тэнцэж байгаа бол Төв банкны албан ёсны ханш нь 2493 төгрөг
байна. Худалдаа хөгжлийн банк өнөөдөр ам.долларыг 2.488 төгрөгөөр авч,
2.499 төгрөгөөр зарж байна. Голомт банк ам.долларыг 2.488 төгрөгөөр авч,
2.499 төгрөгөөр зарж байгаа бол Хаан банк мөн 2.488 төгрөгөөр авч,
2.499 төгрөгөөр зарж байна. Хамгийн сүүлд буюу уржигдрын валютын
дуудлага худалдаагаар банкууд 2491.45 төгрөгийн ханшаар 39 сая
ам.доллар, 354.81 төгрөгийн ханшаар 82.2 сая юань худалдан авах санал
ирүүлжээ.

Монголбанкны хувьд
гадаад валютын дуудлага худалдааг зохистой үед нь зохион байгуулж
байгаа гэсэн мэдээлллийг өгч буй юм. Монгол Улсын Гадаад валютын албан
нөөцийн хэмжээ 2016 оны 11 сарын байдлаар 1.303.9 сая ам.долларт хүрч
өмнөх сараас 25.5 хувь буюу 265.2 сая ам.доллараар өссөн үзүүлэлттэй
гарсан. Нөөц нэмэгдсэн шалтгааныг иргэд, аж ахуйн нэгжүүдийн
Монголбанкинд тушаасан алтны хэмжээ нэмэгдсэн болон Монгол Улсад орох
гадаад валютын урсгал нэмэгдсэн нь голлон нөлөөлсөн гэсэн тайлбарыг
Төвбанкнаас хийгээд байна. Түүнчлэн ОУВС-гийн “Стэнд бай” хөтөлбөр
удахгүй хэрэгжиж эхлэхээр яригдаж буйтай холбогдуулан ам.долларын ханш
буух хүлээлттэй байгаа юм.

Сангийн яамнаас өнгөрсөн оны
арванхоёрдугаар сараас эхлэн ОУВС-тай хамтран ажиллах, “Стэнд бай”
хөтөлбөрт хамрагдах асуудлыг ярьж эхэлсэн. Тэгвэл ОУВС-ийн шинжээчид
нэгдүгээр сарын 20-нд Монгол Улсад ирэхээр болжээ. Сангийн яам, Монгол
Улсын Засгийн газрын зүгээс яриа хэлэлцээрээ үргэлжлүүлж байгаа юм
байна.

ОУВС-ийн шинжээчид Монгол Улсад ирж
нөхцөл байдалтай танилцаад явсан ч өнгөрсөн арванхоёрдугаар сард гадны
улс орнууд зул сарын баярыг өргөн тэмдэглэдэг учраас ийнхүү хойшлоод
байсан юм. Энэ удаад ирэх шинжээчдийн багтай Сангийн яам болон Засгийн
газар ОУВС-ийн ямар хөтөлбөрт хамрагдах, ямар чиглэлээр өөрчлөлт,
шинэчлэлт хийх зөвлөмж авах асуудлаа ярилцах юм байна.

Блүүмбергийн шинжээчид 2016 оны хамгийн сайн ба хамгийн муу үзүүлэлттэй валютуудыг тодруулсан байна.

Хамгийн муу валютаар Египетийн паунд тодорсон бол хамгийн сайн
валютаар ОХУ-ын рубль шалгаржээ. Египет улсад үүссэн эдийн засаг,
нийгмийн тогтворгүй байдал үндэсний валютад нь нөлөөлсөн бол газрын
тосны үнийн сэргэлт Оросын рублийн чансааг сайжруулсан байна.

Хамгийн муу үзүүлэлттэй 10 валютын наймдугаар байранд Монгол Төгрөг
жагсжээ. Египет, Монголын валюттай цуг Суринам, Венесуэл, Нигери,
Мозамбик, Сиерра Леон, Конго, Ангол, Гвинейн үндэсний мөнгөн тэмдэгтүүд
сүүлийн 10 байрыг эзэлсэн байна.

Хувь хүн өөрийн орлого болон банк, санхүүгийн байгууллагаас авсан
зээлийн хөрөнгөөр амьдран суух зориулалтаар анх удаа хувьдаа орон сууцны
барилга барих, эсхүл худалдан авахад зарцуулсан 30 сая төгрөгөөс
дээшгүй хэмжээний хөрөнгөтэй тэнцэх орлогын татвараас чөлөөлөгдөнө.

Монголбанк “Орон сууцны ипотекийн санхүүжилтийн журам”-ын дагуу санхүүжилтээ хэвийн олгож байгаагаа мэдэгдлээ.

“Орон сууцны ипотекийн санхүүжилтийн журам”-ыг өнгөрсөн оны 10 дугаар
сард шинэчлэн баталсан бөгөөд зээлийн хугацаа 360 сар буюу 30 жил
хүртэлх хугацаатай 8 хувийн зээл олгохоор тусгасан. Мөн 30-аас доошгүй
хувийн урьдчилгаа төлөх нөхцлөөр 80м2-аас ихгүй хэмжээтэй орон сууц
худалдан авах боломжийг дээрх журмаар зохицуулсан билээ.

Тэгвэл дээрх хөтөлбөрийн хүрээнд өнгөрөгч 11 дүгээр сарын байдлаар
64.7 тэрбум төгрөгийг нийт 1072 зээлдэгчид олгосон байна. Мөн
банкууд өөрийн эх үүсвэрээр 14 тэрбум төгрөгийн ипотекийн зээлийг тус
тус олгожээ.

Таван толгойн цахилгаан станцын хөрөнгө оруулагчид өнгөрсөн оны арванхоёрдугаар сарын дундуур Сингапурт уулзжээ. Таван толгойн цахилгаан станц төслийн нэгжээс гадна “Марубени”, “Оюу толгой”-н төлөөлөл оролцсон техникийн уулзалтын үеэр төслийн танилцуулга гэх мэт ерөнхий асуудлууд яригдсан гэснээс өөр тоймтой мэдээлэл одоогоор алга. Тэд Улаанбаатарт биш Сингапурт уулзжсан бөгөөд дараагийн уулзалтаа хийхээр төлөвлөжээ.

Хөрөнгө оруулагчаар шалгарсан “Марубени”-д санхүүжилт босгоход хүндрэлтэй байгаа гэх мэдээлэл оны өмнөхөн цацагдсан удаатай. Санхүүжилтийн хувьд ямар ч асуудал байхгүй гэсэн мэдээллийг төслийн нэгжээс өгч байна. Энэ ондоо багтаад Таван толгойн станцын барилгын буюу газар шорооны ажлыг эхлүүлэхээр төлөвлөжээ.

Өнөөдөр “Оюу толгой” компани зөвхөн эрчим хүч худалдаж авахын тулд урд хөршид 200 орчим сая ам.доллар төлж байна.

Засгийн газраас Таван толгойн нүүрсний орд дээр 450 МВт-ын цахилгаан станц барихаар төлөвлөөд байгаа юм. Энэ цахилгаан станц жилд дунджаар нэг сая тонн орчим эрчим хүчний нүүрс хэрэглэх тооцоо бий. Цахилгаан станцыг барьж босгоход 3000 гаруй ажилчин оролцохын дийлэнх нь монголчууд байна гэсэн мэдээллийг албаныхан өгдөг. Станц ажиллаж эхэлснээр улсын төсөвт татвар, хураамж хэлбэрээр жил бүр 150 тэрбум хүртэл төгрөгийн орлого орно гэж Таван толгойн цахилгаан станц төслийн нэгжийнхэн өмнө нь мэдээлж байсан юм.

Сүүлийн үед Монгол банкийг тавин
мянган төгрөгийн тэмдэгт хэвлэж гүйлгээнд нэвтрүүлэх гэж байгаа тухай
мэдээлэл тархаж байгаа нь огт үндэслэлгүй бөгөөд Монголбанк тавин
мянгатын дэвсгэрт хэвлэхгүй болохыг албан ёсоор дахин мэдэгдэж байна.
Хэдийгээр Монгол банк хэвлэл мэдээллийн хэрэгслээр дамжуулан байр сууриа
илэрхийлж байсан ч ташаа мэдээлэл дахин газар авч, улмаар тавин
мянгатын дэвсгэртийн зохиомол загвар үзүүлж олон нийтийг төөрөгдөлд
оруулж байгааг санаатай байж болзошгүй үйлдэл гэж үзэж байна.

Монгол Улсад шинэ мөнгөн тэмдэгт
гаргахыг УИХ хуулиар хүлээсэн бүрэн эрхийнхээ дагуу хэлэлцэн шийддэг
эрх бүхий субьект мөн. Одоогоор Монгол Улсад шинэ мөнгөн тэмдэгт
нэвтрүүлэх хэрэгцээ шаардлага байхгүй ба эдийн засгийн хүндрэлээс
гарахын тулд том мөнгөн дэвсгэрт хэвлэхэд анхаарах бус харин аль болох
богино хугацаанд эдийн засгаа сэргээхэд гол анхаарлаа хандуулж байгаа
болно.

Иймд иргэд та бүхнийг хуурамч мэдээлэлд автахгүй байхыг хүсье.

Монголбанкны Олон нийтийн боловсрол мэдээллийн төв