Ази-Далайн орнуудын боксчид Иорданы Амман хотноо чуулж, “Токио-2020” олимпийн эрхийн төлөө өрсөлдөж эхэллээ. 35 орны 221 боксчин хүч сорьж буй энэ тэмцээнээс олимпийн 63 эрхийг хуваарилах юм. Үүнээс эрэгтэйчүүдийн найман жинд 41, эмэгтэйчүүдийн таван жинд 22 эрх хуваана.
Манай улсаас бүх жинд боксчид Амманд тулалдаж байгаа бөгөөд өчигдөр эрэгтэйчүүдийн 52 кг-д Х.Энхмандах (зураг дээр) Тажикистаны Ш.Сабзалиевийг эхний үед техникийн нокаутаар, 69 кг-д Б.Мишээлт Катарын Т.Тарумалингамыг 5:0 илт давуугаар, эмэгтэйчүүдийн 57 кг-д Т.Болортуул Папуа-Шинэ Гвинейн Ф.Логаг гуравдугаар үед хүнд цохилтоор тус тус яллаа. Өнөөдөр манай боксчдоос 63 кг-д Б.Чинзориг Папуа-Шинэ Гвинейн Ж.Уметэй, 75 кг-д О.Бямба-Эрдэнэ Сирийн А.Гоусоонтой, 81 кг-д Н.Шинэбаяр Вьетнамын Нгуен Ман Куонтой тус тус тулалдах болно.