БНСУ-ын ерөнхийлөгч Пак Гын Хе төрд алба хашдаггүй, бизнес эрхлэгчид төрийн нууц мэдээлэл задруулж, авилга хээл хахуулийн хэрэгт холбоотой байж магадгүй дуулианы дунд өөрийн ахлах зөвлөх, нарийн бичгийн дарга нараа халах үүрэг чиглэл өгсөн байна. Одоогоор зөвлөх, нарийн бичгийн дарга нийт 10 хүнийг албан тушаалаас нь халах асуудал яригдаж байна. Ерөнхийлөгч Пак Гын Хедотны найз, бизнес эрхлэгч Чой Сун Сил гэгч эмэгтэйд өөрийн хэлэх үгээ бэлтгэхдээ зөвөлгөө авах үүднээс хэлэх үгийнхээ эх хувийг өгч байсан гэдгээ хүлээн зөвшөөрсөн. Мөн тэрээр дипломат ажиллагаа болон хөх ордон дахь албан тушаалтны томилгоотой холбоотой дотоод асуудлын талаарх баримт материалуудыг ч Чой Сун Сил гэгч эмэгтэйд өгсөн гэдгээ хүлээж, ард түмнээсээ уучлалт гуйгаад байгаа юм.
Гэвч Чой Сун Сил гэгч нь төрд ямар ч албан ёсны ажил эрхэлдэггүй, зөвхөн бизнес эрхэлдэг хүн байгаа нь асуудлыг улам хүндрүүлж байна. Үүнтэй холбоотойгоор түүнийг засгийн газраа бүрэн бүрэлдэхүүнээр нь огцруул гэсэн шаардлагыг ч ард түмэн нь тавьж байна. Одоо Өмнөд Солонгосын иргэдийн дунд Чой гэгч нь улс төрийн олон асуудалд маш гүнзгий оролцож байжээ гэсэн ойлголт бий болж байна. Ерөнхийлөгч Төрийн нууц задруулсан, авилга хээл хахуулийн хэрэгт холбоотой байж болзошгүй бизнес эрхлэгч эмэгтэйн удирддаг сангуудад хууль бус санхүүжилт оруулсан байж магадгүй энэ хэргийг Сөүлийн прокурорууд шалгаж байгаа юм байна. Энэ дуулианы улмаас ерөнхийлөгч Пак Гын Хегийн ард түмнийхээ дунд нэр хүнд нь 2013 онд төрийн эрхийг авснаас хойш хамгийн доод түвшинд буюу 17,5 хувьд хүртлээ унасан байна.
Өмнөд Солонгосын хэвлэлүүдээр Чой Сун Сил гэгч эмэгтэй ерөнхийлөгч Пактай ойр дотно нөхөрлөлийн харилцаагаа засгийн газрын өндөр албан тушаалтнууд болон бизнес эрхлэгчдээс авилга хээл хахууль авахад ашигласан байж болзошгүй тухай мэдээлсэн байна. Одоо хөх ордоны тэргүүн өөрийн бүх нарийн бичгийн дарга нарыг сольж, ерөнхийлөгчөөр ажиллах үүрэг зорилтоо өөрчлөн, сайжруулах бодолтой байж магадгүй гэж ажиглагчид таамаглаж байна.
Гэхдээ ард түмний дийлэнх хувь нь ерөнхийлөгчөө ийм том хэрэг мандуулсныхаа төлөө хариуцлага үүрч, албан үүргээсээ огцрох нь зүйтэй гэж үзэж байгаа ийм үед түүний энэ шийдвэр үр дүнтэй байна гэдэгт ажиглагчид эргэлзэж байна. Өнөөдөр л гэхэд засгийн газраа эсэргүүцсэн өргөн хэмжээний жагсаалыг Сөүл хотод зохион байгуулж байгаа юм байна. Энэ улс төрийн дуулиант хэрэг ирэх оны сонгуулийн өмнө ерөнхийлөгч Пак Гын Хегийн байр суурийг ганхуулж магадгүй нөхцөл байдал үүсэж байна.