“Бид уучлахгүй” хөдөлгөөний зохицуулагч Б.Мөнхцэлмэгийг болон яаманд цугласан иргэдийг цагдаа, хамгаалалтын албаныхан хүч хэрэглэн гаргаж, харин Б.Мөнхцэлмэгийг баривчиллаа. Болсон үйл явдлын тухайд Б.Мөнхцэлмэг “Бид 2019 оны тайлант хугацаа дуусаад төрийн байгууллагынхны шилэн дансанд анализ хийсэн. Хууль зүй, дотоод хэргийн яамны шилэн дансыг үзэхэд шинэ барилгадаа 626 саяын тавилга, тохижилт хийсэн байна. Үүнээс 51.6 сая төгрөгөөр Төрийн нарийн бичгийн даргын өрөөгөө, яамны үүдний хэсгийг 61 сая төгрөгөөр, уулзалтын өрөөг 46.9 сая төгрөгөөр дотор засал хийсэн. Үүнийг үзэх хүсэлт тавьсан. Төрийн нарийн бичгийн даргын өрөөг бүтэн байрны үнээр тохижуулсан байна шүү дээ. Ямар тохижилт хийснийг л хармаар байна. Хууль зүй дотоод хэргийн яам шинэ байранд орсонтой холбогдуулан олон сая төгрөгийн зардлаар тохижуулсан өрөөг орж харах хүсэлт тавьсан. Гэвч ХЗДХЯ даргынхаа өрөөг үзүүлж чадахгүй байгаа нь ямар нэгэн зүйл нуусан гэж үзэж байна” хэмээгээд тус яамны Төрийн захиргаа удирдлагын газрын дарга Д.Жанчивдоржийг гарч ирж мэдээлэл өгөхийг шаарджээ.