Монгол Улсад хэрэгжүүлж буй ОУВС-ийн Өргөтгөсөн санхүүжилтийн хөтөлбөрийн хүрээнд арилжааны банкуудад өнгөрсөн онуудад активын чанарын үнэлгээ хийж, зарим банканд өөрийн хөрөнгөө нэмэгдүүлэх шаардлага тавьсан бөгөөд өөрийн хөрөнгөө нэмэгдүүлсэн банкуудын хөрөнгийн эх үүсвэрийг ОУВС болон Монголбанкнаас шалгах ажлыг зохион байгуулах гэж байна. Шалгаж, тогтоох байгууллагыг Монголбанк Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу сонгон шалгаруулахаар ажиллаж байгаа аж. Тиймээс банкууд өөрийн хөрөнгөө нэмэгдүүлсэн эх үүсвэрээ нотлох шаардлагатай болох юм байна. Хэрэв эх үүсвэрээ нотолж чадахгүй бол ОУВС-аас олгох зургаа дахь шатны санхүүжилт саатах нөхцөл байдал үүсч магадгүй юм байна.