Монголын сурагчдын холбоо өнөөдөр багш нарын хугацаагүй ажил хаялтын талаар байр сууриа илэрхийллээ. Тэд МҮЭХ, багш нарын эрх ашгийн төлөө тэмцэж байгааг ойлгож байгаагаа мэдэгдэж, хүүхдүүдтэй холбоотой асуудалд мөн адил дуу хоолойгоо хүргэж ажиллана гэсэн юм. Мөн хүүхдүүдийн язгуур эрх ашгийг харгалзан үзэхгүйгээр хугацаагүй ажил хаяж байгааг анхаарч, хүүхдийн эрхийг нэн тэргүүнд тавьж ажиллахыг хүслээ.
Монголын сурагчдын холбооны ерөнхий нарийн бичгийн дарга Г. Төгсөө ингэж ярив.
Манай холбооны зүгээс багш нарын хугацаагүй ажил хаялттай холбоотой холбогдох байгууллагуудад мэдэгдэл хүргүүлсэн. Үүний хариуг шат шатанд нь аваад ажиллаж байна. Багш нар хугацаагүй ажил хаяна гэдэг нь хүүхдийн язгуур эрх ашиг, хүүхдийн эрх хамгаалал ноцтойгоор зөрчигдөнө гэсэн үг. Магадгүй үүний цаана ямар аймшигтай зүйл хүлээж байгааг бид тааж хэлэх аргагүй. Хүүхдүүд хичээл завсардсанаас болж, PC тоглоомын газар тоглож гэмт хэрэг зөрчилд холбогдох вий гэж сэрэмжилж байна. Мөн эцэг эхчүүд бага насны хүүхдүүдээ тэр бүр дагуулаад явах боломжгүй. Гэрт нь түгжээд явж байгаа эцэг эх олон. Үүнтэй холбоотой олон эрсдэл үүсч байгаа учир энэхүү мэдэгдлийг хийж байна гэв
Б.АМАРТҮВШИН