МУГЖ, дуучин Б.Сарантуяа өнгөрсөн оны арваннэгдүгээр сарын 12-нд буюу “Монгол бахархлын өдөр”-өөр Герман улсын нийслэл Берлин хотод “Сэхүүн салхи” CD-ний баяраа тэмдэглэсэн. Мөн “Хөх толботон” нийгэмлэгийн урилгаар Польшийн Брадиславль хотод тоглолтоо хийгээд буй. Тэгвэл энэ удаад “Евро аялал” тоглолтоо үргэлжлүүлэн Европын орнуудаар аялан тоглохоор болжээ.
Энэ сарын 15-ны өдөр Швейцарийн Женев хотоос тоглолтоо эхлэхээр төлөвлөөд буй гэнэ. Түүний дараагаар Францын Ренн, Норвегийн Осло, Австрийн Вени, Белгийн Антверпен, Туркын Станбул зэрэг зургаан хотод тоглох юм байна. Түүний тоглолтод залуу дуучин, Гэрэл болон охин Хулан нар оролцох аж.
Б.Сарантуяа 30 жилийн турш тайзнаа дуулсан бөгөөд энэхүү баяраа тэмдэглэхээр хандив цуглуулж тоглолт хийж буй тухайгаа хэлж байсан. Мөн “Энэ удаагийн тоглолт харийн нутагт ажиллаж амьдарч байгаа монголчуудад аз жаргал, эрч хүч бэлэглэнэ гэдэгт эргэлзэх зүйл алга” хэмээсэн юм.