Нийслэлийн хэмжээнд нэгдүгээр сарын 18-ны өдрийн 05:00 цагаас нэгдүгээр сарын 19-ний өдрийн 05:00 цагийн хооронд иргэд, байгууллагаас нийт 3787 удаагийн дуудлага иржээ. Эдгээрээс гэмт хэргийн 125, зөрчлийн 1065, согтуугийн 460, зам тээврийн ослын 371 дуудлага байсан байна. Иргэдээс ирүүлсэн эдгээр мэдээллийг шалгахад, гэмт хэргийн шинжтэй 81 үйлдэл бүртгэгдсэнийг холбогдох алба нэгжүүд шалгаж байгаа юм байна.
Тухайлбал, Баянзүрх дүүргийн 19 дүгээр хорооны “Цайзын автобусны буудал дээр үл таних 3 залууд дээрэмдүүллээ” гэсэн мэдээллийг шалгахад: Баянзүрх дүүргийн долдугаар хороонд суух 38 настай эрэгтэй Э-ын “Toyota Platz” автомашин, 20.000 төгрөгийг тус дүүрэгт оршин суух 28 настай М бусадтай бүлэглэн зодож дээрэмдсэнийг илрүүлжээ. Хэргийг одоогоор Баянзүрх дүүргийн цагдаагийн нэгдүгээр хэлтэст шалгаж байгаа аж.