Сүүлийн үед тээврийн хэрэгсэлтэй холбоотой хулгайн гэмт хэрэг нэлээд гарах болсон байна.
Тухайлбал, Сонгинохайрхан дүүргийн 19 дүгээр хороо 58 дугаар байрны гадна байрлуулсан машинаас эд зүйлээ алдсан гэсэн мэдээлэл цагдаагийн байгууллагад иржээ.
Мэдээллийн дагуу шалгахад, “Prius 20” маркийн автомашины хоёр толийг хулгайлсан байжээ. Хэргийг тус дүүргийн цагдаагийн нэгдүгээр хэлтсийнхэн шалгаж байгаа аж.
Мөн Сонгинохайрхан дүүргийн цагдаагийн гуравдугаар хэлтэс дээр 8-12 дугаар сарын хооронд нийтдээ 17 удаагийн үйлдлээр Баянгол дүүргийн нутаг дэвсгэр, Сонгинохайрхан дүүргийн нутаг дэвсгэрт байрлах байрнуудын гадна тавьсан тээврийн хэрэгслийн гурвалжин цонхыг нь эвдлэн эд зүйл хулгайлдаг Б, Г гэгч 23-25 насны хоёр залууг илрүүлэн хэрэг бүртгэл, мөрдөн байцаалтын ажиллагаа явуулж байгаа юм байна.
Тухайн этгээдүүд мөрдөн байцаалтын явцад харанхуй, гэрэлгүй, албан ёсны зогсоолгүй байрны гадаа тавьсан тээврийн хэрэгслүүдийн гурвалжин цонхыг шөнийн цагаар эвдэн, дотор нь байгаа эд зүйлийг хулгайлдаг хэмээн мэдүүлээд байгаа аж.
Тиймээс иргэдийг тээврийн хэрэгслээ зориулалтын зогсоолд байршуулах, хэрэв боломжгүй бол дохиололтой болгох зайлшгүй шаардлага байгааг ЦЕГ-аас анхааруулж байна.