13 жил гадаадад зугтсаны эцэст Хятадын авлигын хамгийн том хэрэгтэн 70 настай Ян Шюзүг өчигдөр АНУ-аас баривчлан нутагт нь авчирлаа.
Тэрээр Хятадаас эрэн сурвалжилж байгаа топ 100 эдийн засгийн болон авлигын хэрэгтний эхэнд нэрлэгдэж Интерполоор зарлагдаад байв.
Ян нь хөгжил цэцэглэлтээрээ тэргүүлж байсан Зежянь мужийн Вэнжоу хотын дэд дарга байхдаа 250 сая юаний (88 тэрбум төгрөг орчим) авлига авсан ажээ.
Хэрэг илэрсний дараа буюу 2003 онд Ян Хятадаас зугтаж Хонг Конг, Сингапур, Франц, Нидерланд, Италид амьдарч байжээ.
Франц, Нидерландаас улс төрийн орогнол авч чадаагүй Ян 2014 онд хуурамч паспортоор АНУ-д нэвтрэх гэж оролдоод баригдсан байна. Тэрээр хоригдож байхдаа АНУ-аас улс төрийн орогнол хүссэн байжээ. Хятадын тал ялтан солилцох гэрээний хүрээнд Янийг АНУ-аас шилжүүлж авахыг оролдоод бүтээгүй юм. Тиймээс Хятадын албаныхан АНУ-д хэдэнтээ очиж Янг ятгасны эцэст тэр сайн дураар нутагтаа харихыг зөвшөөрчээ.
Эх сурвалж: South China Morning Post